Қирғизистон ва Тожикистон чегарасида чегарачилар ўртасида навбатдаги отишма бўлиб ўтди. Бу ҳақда Қирғизистон чегара хизматига таяниб, «РБК» хабар бермоқда.
Қирғизистон чегара хизматининг маълум қилишича, 14 сентябрь куни эрталаб Боткен туманининг Булоқбоши қишлоғидаги чегара участкасида тожикистонлик чегарачилар аввалги келишувларни бузган ҳолда жанговар позицияларни эгаллагани аниқланган.
«Қирғиз томонининг ҳудудни тарк этиш ҳақидаги қонуний талабларига эътибор бермай, тожик чегарачилари ўт очди», — дейилади хабарда. Бунга жавобан қирғиз чегарачилари ҳам ўт очган. Чегара хизмати Тожикистон томони миномётлардан фойдаланганини даъво қилмоқда.
«2022 йил 14 сентябрь куни соат 09:30 (Тошкент вақти билан 08:30) ҳолатига кўра, отишмалар гоҳ бошланиб гоҳ тиниб турибди», — дея қўшимча қилди чегара хизмати.
Дастлабки маълумотларга кўра, Қирғизистон томонидан қурбонлар йўқ. Томонлар телефон орқали мулоқот қилган ва юзма-юз учрашишни режалаштирмоқда.
Қирғизистон ва Тожикистон чегараси вақти-вақти билан икки мамлакат маҳаллий аҳолиси ва чегарачилари ўртасидаги низолар ҳудудига айланиб туради. Бунга сабаб делимитация қилинмаган ерлар бўлиб, у ерларда давлатлар ўртасидаги чегара қаердан ўтишини аниқлаб бўлмайди.
Изоҳ (0)