Коллектив хавфсизлик шартномаси ташкилоти (КХШТ — Арманистон, Беларусь, Қозоғистон, Қирғизистон, Россия ва Тожикистон киради) Арманистон-Озарбайжон чегарасидаги вазият яна кескинлашиши фонида ўз миссиясини Арманистонга юборишга қарор қилди, деб ёзади Meduza.
КХШТ бош котиби Станислав Зас раҳбарлик қилувчи миссия мақсади «юзага келган вазиятга баҳо бериш»дан иборат бўлади. Миссия иттифоқ давлатлари раҳбарлари учун маъруза тайёрлайди, у кеч кузда Ереванда бўлиб ўтиши режалаштирилган сессияда тақдим этилади.
Миссияни юбориш ҳақидаги қарор КХШТ коллектив хавфсизлик кенгашининг Арманистон ташаббуси билан чақирилган шошилинч йиғилиши якунларига кўра қабул қилинди.
13 сентябрга ўтар кечаси Озарбайжон чегара яқинида Арманистон ҳудудини артиллериядан ўққа тутди. Боку бунга Арманистон томонидан «кенг кўламли провокация» сабаб бўлганини маълум қилди.
Арманистон 49 нафар ҳарбий хизматчиси ҳалок бўлганини, Озарбайжон эса ўз томонидан 50 киши қурбон бўлганини маълум қилди.
Арманистон аввалроқ вазиятни тартибга солишда ёрдам сўраб Москвага, КХШТ ва БМТ Хавфсизлик кенгашига мурожаат қилганди. Арманистон мудофаа вазири Сурен Папикян Россия мудофаа вазири Сергей Шойгу билан телефон орқали суҳбатлашди. Улар «вазиятни барқарорлаштириш йўналишида зарур қадамларни ташлаш ҳақида келишувга эришди», дея маълум қилди Арманистон Мудофаа вазирлиги.
Россия Ташқи ишлар вазирлиги «вазият кескинлашуви муносабати билан жуда кучли хавотир» билдирди ва низо томонларини ҳолатни янада кучайтиришдан тийилишга чақирди. Россия президентининг матбуот котиби Дмитрий Песков Россияда Арманистон-Озарбайжон чегарасидаги вазиятни тартибга солиш бўйича «экспертлар даражасида қизғин ишлар» олиб борилаётганини айтди.
КХШТ матбуот котиби Владимир Зайнетдинов ташкилот куч ишлатишни номақбул деб ҳисоблашини айтди ва «зиддиятларни сиёсий-дипломатик усуллар билан тартибга солиш»га чақирди.
13 сентябрь куни кечқурун Арманистон ва Озарбайжон яна бир-бирини отишмаларда айблади. Шу билан бирга, Арманистон Мудофаа вазирлиги уларнинг шиддати «анча сусайгани»ни маълум қилди. Озарбайжон даъво қилишича, «Арманистон артиллерия ва бошқа оғир қурол-яроғлардан фойдаланиб, чегара бўйлаб ярашув битимини шиддат билан бузмоқда».
Изоҳ (0)