Кремль Тожикистондан совет артиллерия тизимлари учун ўқ-дорилар сотиб олишга интилмоқда ва истеъфодаги ҳарбийларга Украинадаги урушга боришни таклиф қилмоқда. Бу ҳақда The Insider нашри Украина Разведка бош бошқармасига таяниб хабар берди.
Маълумотларга кўра, Россия Ҳарбий-техник ҳамкорлик федерал хизмати ҳарбий ўқ-дориларни тақдим этишни сўраб Тожикистон Мудофаа вазирлигига мурожаат қилган.
«Гап ‘Ураган’ баравар ўт очиш реактив тизимининг 220 миллиметрли реактив ракеталари, ‘Пион’ ўзиюрар артиллерия қурилмасининг 203 миллиметргача ўқ-дорилари ҳамда БМП-1 ва БМП-2 учун УТД-20 двигателларини тақдим этиш ҳақида бормоқда. Ушбу ўқ-дорилар совет артиллерия тизимларида қўлланилади», — дейилади хабарда.
Бундан ташқари, хабарда айтилишича, «Тожикистон ИИВ ходимлари ва истеъфодаги ҳарбийлар Россия Қуролли кучлари билан шартнома тузиш ҳақида таклифлар олмоқда».
«Тожикистонлик ҳарбийларга Россия томонидан Украинадаги низода иштирок этиш таклиф қилинмоқда», — дейилади хабарда.
Аммо Тожикистон Мудофаа вазирлиги Asia Plus нашри сўровига жавобан бу ахборотни расман тасдиқламади ҳам, рад этмади ҳам.
Вазирликдаги манбага кўра, «бундай қарорлар ва келишувлар идоранинг олий даражали вакиллари томонидан қабул қилинади ва оддий ходимлар бундай маълумотлар билан таниша олмайди».
Изоҳ (0)