АҚШ «Россиянинг яширинча таъсири» ҳақидаги маърузасини ошкор этди

АҚШ ўз разведкасининг Россия томонидан бошқа мамлакатларнинг «яширинча сиёсий молиялаштирилиши» ҳақидаги маърузасини қисман ошкор қилди, деб ёзади «РБК». Бу ҳақда брифингда Америка маъмуриятининг юқори мансабли вакили маълум қилди.

Мансабдорнинг сўзларига кўра, АҚШ разведкаси аниқлашича, 2014 йилдан буён Россия чет элдаги таъсирини кучайтиришга 300 миллион доллардан ортиқ маблағ сарфлаган. Пуллар 20 дан зиёд мамлакатдаги хориж партиялари, сиёсатчилари ва амалдорларига йўналтирилган, деди у. Айнан қайси мамлакатлар ҳақида гап бораётганига АҚШ президенти маъмурияти аниқлик киритмади.

Россия ҳукумати бошқа мамлакатлар ички ишларига аралашганлик ҳақидаги айбловларни кўп бора рад этиб келган. «Биласизки, Россия ўзининг ички ишларига аралашувни ҳеч қачон маъқулламаган ва ўзи ҳам ҳеч қачон бундай қилмайди, шундай ҳолат юз берганида, қатъиян қарши чиқади», — деган эди президент матбуот котиби Дмитрий Песков.

АҚШ Россияни сайловларга аралашишда ҳам айблаган. Июнь ойида CNN Вашингтон ноябрь бошида бўлиб ўтадиган вакиллар палатаси ва сенатга сайловларга аралашиши мумкинлигидан хавотирда эканини маълум қилганди.

Песков бундай айбловларни асоссиз деб атаган ва Вашингтон томонидан берилаётган шундай хабарларни «қайсарлик васвасаси» билан изоҳлаган эди. «Сайлов кампанияси чоғида барча Вашингтон сиёсатчиларининг ёзув столи қизил бурчагида Россия харитаси турганини кўряпмиз», — деган эди президент матбуот котиби 2016 йилдаёқ.