АҚШ февралдан бери қарийб 1,5 минг украиналик аскарни Америка қуролларидан фойдаланишга ўргатди

Америкаликлар 2022 йилнинг февраль ойидан бери Украина Қуролли кучларининг 1475 нафар аскарини АҚШ томонидан Украинага етказиб берилган қуроллардан фойдаланишга ўргатди.

Хусусан, 630 нафар украиналик аскар М777 гаубицаларидан, 325 нафари эса HIMARS баравар ўт очувчи реактив тизимларидан, 300 нафар ҳарбий М109 гаубицаларидан фойдаланишни ўрганган. Яна 120 киши М113 пиёдаларнинг жанговар машиналаридан, 100 нафари эса Америка дронларидан фойдаланиш бўйича сабоқ олган.

Аввалроқ Пентагон АҚШ февраль ойи охиридан бери Украинага 140 та артиллерия тизими ҳамда улар учун 660 минг снаряд ва ракеталар етказиб бергани ҳақида хабар қилганди.

Шунингдек, АҚШдан зирҳли нишонларга қарши курашиш учун 41 000 та кўчма ракета комплекслари, 1400 та кўчма зенит-ракета тизимлари, 15 та вертолёт, 38 та радар, 10,2 мингта автомат ва тўппонча, ўқотар қуроллар учун 63,8 миллионга яқин патрон ҳамда 18 та патруль қайиқлари жўнатилган.

Мазкур ҳарбий юкларни етказиб бериш мақсадида оғир транспорт самолётлари (ҳам ҳарбий, ҳам Пентагон томонидан ижарага олинган) Европага 754 та парвозни амалга оширган. Шунингдек, жараёнда 28 та кема, 67 та поезд ва 1,5 мингта тиркама иштирок этган.

Жами ҳисобда Украинага ўтказиш учун Европага 47 минг тоннадан ортиқ қурол ва ҳарбий техника етказиб берилган.

АҚШ Мудофаа вазирлиги маълумотларига кўра, қуролларнинг катта қисми Украина билан чегарадан 90 километр узоқликда жойлашган Польшанинг Жешув шаҳри аэродромига етказилган.