«Ал-Қоида» 11 сентябрь терактлари ҳақида китоб чиқарди

«Ал-Қоида» ташкилоти 2001 йил 11 сентябрда АҚШда содир этилган террорчилик ҳаракатларига бағишланган китоб чоп этди, деб ёзади «Коммерсантъ».

Китоб терактларга 21 йил тўлишига атаб нашр этилган. Унинг муаллифи сифатида «Ал-Қоида» етакчиларидан бири Абу Муҳаммад ал-Масрий кўрсатилган бўлиб, у 2020 йил Эронда ўлдирилган.

Китобда айтилишича, АҚСHgа зарба бериш ғояси «Ал-Қоида»да 1996 йилда, «Толибон» ҳаракати Афғонистонда ҳокимиятни қўлга олиб, «Ал-Қоида» ушбу мамлакатни ўзининг асосий базаси сифатида танлаганидан кейин пайдо бўлган. АҚСHgа ҳужум қилишдан мақсад сифатида «Ал-Қоида»нинг америкаликларни «ҳалокатга олиб борувчи узоқ муддатли уруш»га жалб қилиш истаги келтириб ўтилган.

Маълум қилинишича, фуқаролик самолётларини «Американинг муҳим ва рамзий биносига бориб уриш» орқали теракт содир этиш таклифини «Ал-Қоида»га илгари учувчи бўлиб ишлаган мисрлик аъзоларидан бири берган.

Ташкилотнинг баъзи иштирокчилари 1998 йилдаёқ жанговар тайёргарлик учун танлаб олинган ва дунёнинг турли бурчакларидаги авиация мактабларида ўқитилган.

Эслатиб ўтамиз, 2001 йил 11 сентябрь куни тўртта мувофиқлаштирилган террорчилик ҳаракатлари амалга оширилган эди. Террорчиларнинг тўртта гуруҳи — жами 19 киши тўртта йўловчи самолётини эгаллаб олди. Улар иккита лайнерни Нью-Йоркдаги Жаҳон савдо маркази минораларига йўналтирди, учинчиси Пентагон биносига бориб урилди. Тўртинчи авиалайнер йўловчилари ва экипажи террорчилардан самолёт бошқарувини олиб қўйишга уринди ва самолёт Пенсильвания штатидаги далага қулади.

19 террорчидан ташқари, 2977 киши ҳалок бўлди, яна 24 киши бедарак йўқолди.

Терактлардан кейин НАТО қўшинлари Афғонистон ва Покистонда «Ал-Қоида» ва «Толибон»га қарши қасос ҳаракатларини олиб борди, Америка ва иттифоқдошлари қўшинлари Ироққа киритилди, оқибатда Саддам Ҳусайн режими ағдарилди ва «Ал-Қоида»нинг бир қатор етакчилари, шу жумладан, Усама бин Ладен йўқ қилинди.

Бин Ладеннинг ўлимидан кейин 2011 йилда «Ал-Қоида» етакчисига айланган Айман аз-Завоҳирий Афғонистонда бир ойча аввал АҚШ авиазарбаси натижасида ўлдирилди.