Bugun,

  • USD 11095.31
  • RUB 173.84
  • EUR 10772.44

Rossiya Afg‘onistonda yuz berayotgan voqealar fonida o‘zining Qirg‘iziston va Tojikistondagi harbiy bazalari, shuningdek, boshqa inqirozli vaziyatlarga javob ko‘rsatish kuchlari jangovar shayligini oshiradi. Bu haqda Rossiya mudofaa vaziri Sergey Shoygu Shanxay hamkorlik tashkiloti (ShHT)ga a’zo mamlakatlar mudofaa vazirlari majlisida ma’lum qildi, deb yozadi “RBK”.

Sergey Shoygu

Sergey Shoygu
Foto: “TASS”

“O‘z tomonimizdan Qirg‘iziston va Tojikistondagi Rossiya harbiy bazalarining, shuningdek, boshqa ehtimoliy inqirozli vaziyatlarga javob ko‘rsatish kuchlarining jangovar shayligini oshiramiz”, — dedi idora rahbari.

Qirg‘izistonda Rossiyaning “Kant” harbiy aviabazasi bo‘lib, u Chuy viloyatida joylashgan va 2003-yilda ochilgan. U yerda Su-25SM samolyotlari va Mi-8MTV vertolyotlari bazasi joylashgan. Tuzilmaviy jihatdan baza Rossiya Markaziy harbiy okrugining bir qismi hisoblanadi.

Tojikistonda Rossiya tashqarisidagi eng yirik 201-harbiy baza faoliyat olib boradi. U Dushanbe va Boxtarda joylashgan. U yerga razvedka, radiatsiya, kimyoviy va biologik himoya qo‘shinlari, shuningdek, aloqachilar joylashtirilgan. Bazada motoo‘qchilar, tank, artilleriya va havo hujumiga qarshi bo‘linmalar bor.

Afg‘onistondagi vaziyatni “Al-Qoida” va IShID kabi terrorchilik tashkilotlarining qizg‘in faoliyati murakkablashtirmoqda. Bu mamlakatdagi holat “Markaziy Osiyoda xavfsizlikka jiddiy tahdid bo‘lib qolmoqda”, deb hisoblaydi vazir Shoygu.

ShHT mamlakatlari mudofaa vazirlari yig‘ilishi Toshkentda bo‘lib o‘tmoqda. Unda Rossiya, Hindiston, Qozog‘iston, Xitoy, Qirg‘iziston, Pokiston, Tojikiston va O‘zbekiston, shuningdek, tashkilot huzuridagi kuzatuvchi mamlakat sifatida Belarus vakillari qatnashmoqda.

Izoh
Asosiy yangiliklar
Dunyo
“Turkiya yangi dunyo tartibining markazida bo‘lishi kerak” — Erdo‘g‘on
Mahalliy
Andijonda 41 kishi jarohatlangan avtohalokat qurbonlari soni 4 nafarga yetdi
Mahalliy
O‘zbekistonda pomidor narxi barqarorlashdi