Озарбайжон қуролли кучлари Арманистон билан чегарада жанговар ҳаракатларни қайта бошлади. Бу ҳақда Арманистон Мудофаа вазирлиги хабар бермоқда.
Вазирлик маълумотларига кўра, 14 сентябрга ўтар кечаси Арманистон—Озарбайжон чегарасида вазият таранглигича қолган. Хусусан, Озарбайжон ҳарбийлари Жермук курорт шаҳри йўналишида ҳужумчи дронларни ишлатган.
Арманистон Мудофаа вазирлиги маълумотларига кўра, 14 сентябрь куни эрталаб Озарбайжон томони артиллерия, миномёт ва йирик калибрли қуроллардан фойдаланган ҳолда қайта ўт очишни бошлаган, шунингдек, Жермук ва Севан кўли яқинидаги Верин Шоржа қишлоғи йўналиши бўйича ҳужум операцияларини бошлаган.
Ўз навбатида, Озарбайжон Мудофаа вазирлиги Арманистонни Озарбайжон қўшинларининг Калбажар ва Лочин вилоятларидаги позицияларини ўққа тутганликда айблади.
Арманистон ва Озарбайжон ўртасида янги кескинлашув 13 сентябрга ўтар кечаси юз берганди. Арманистон томони Озарбайжон ҳарбийларини чегара яқинидаги шаҳар ва қишлоқларни ўққа тутганликда айблади. Бокунинг маълум қилишича, ўт очиш Арманистоннинг «кенг кўламли провокацияси»га жавоб бўлган.
Арманистон жанговар ҳаракатлар оқибатида 49 нафар, Озарбайжон эса 50 га яқин аскари ҳалок бўлганини маълум қилди. Жанглар туфайли Арманистон ҳукумати Россия, Коллектив Хавфсизлик Шартномаси Ташкилот ва БМТ Хавфсизлик Кенгашига аъзо давлатларга мурожаат қилди. Натижада КХШТ «мавжуд вазиятни баҳолаш» учун Арманистонга ўз миссиясини юборишга қарор қилди.
Изоҳ (0)