Қирғизистон билан чегарадаги отишмада тожикистонлик чегарачи ҳалок бўлди

Қирғизистон билан чегарадаги отишма вақтида Тожикистон чегара хизмати ходими ҳалок бўлди. Бу ҳақда Исфара марказий касалхонасига таяниб, «Спутник Тажикистан» хабар берди.

Хабарга кўра, яна икки киши жароҳатланган. «Жабрланганлар интенсив терапия бўлимига ётқизилди. Ҳозир улар шифокорлар назоратида», — деди нашр манбаси.

Айни вақтда Asia-Plus ёзишича, Ворух жамоат касалхонаси беш нафар ярадор тожикистонлик аскар ҳақида хабар берган.

Тожикистон ва Қирғизистон чегарасида 14 сентябрь куни эрталаб отишма бўлиб ўтган эди.

Қирғизистон чегара хизмати Боткен вилоятининг Булоқбоши қишлоғида тожик чегарачилари келганини маълум қилди. Идора маълумотларига кўра, улар чегара участкасида жанговар позицияларни эгаллаб, аввал эришилган келишувларни бузган, сўнгра Қирғизистоннинг ҳудудни тарк этиш ҳақидаги талабларини эътиборсиз қолдириб, миномётлардан ўқ узган.

Тошкент вақти билан соат 10:30 га келиб, чегарада вазият кескинлигича қолмоқда, дея хабар қилди «Спутник Қирғизистан». Агентлик Тожикистон томонини вақти-вақти билан қирғиз чегарачилари позицияларини ўққа тутаётганликда айблади. Қирғизистон томонида жабрланганлар йўқ.

Ўз навбатида, Исфара шаҳар ҳокимлиги матбуот котиби Зубайдулло Шомадовнинг маълум қилишича, Кех маҳалласи Ворух чегара ҳудудидаги отишма маҳаллий вақт билан 7:15 (Тошкент вақти билан 6:15) да бошланган.

«Қирғизистон ҳарбий хизматчилари ҳеч қандай сабабсиз ушбу ҳудудда хизмат қилаётган тожикистонлик чегарачиларнинг ҳарбий қисмига қарата ўт очди. Мавжуд вазиятдан келиб чиқиб, жавоб ўти очилди», — деди у.

Тожикистон чегара хизмати ҳозир томонлар вазиятни барқарорлаштириш бўйича музокаралар олиб бораётганини қайд этди.