«Дарё» нашри 14 сентябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Шанхай ҳамкорлик ташкилоти муносабати билан Самарқандга давлат раҳбарлари ташрифи
Бугун ШҲТ саммити муносабати билан Самарқандга Мўғулистон президенти Ухнаагийн Хурельсух, Эрон Ислом Республикаси президенти Иброҳим Раисий, Қирғизистон Республикаси президенти Садир Жапаров ҳамда Хитой Халқ Республикаси раиси Си Цзиньпин, шунингдек, Бирлашган Миллатлар Ташкилоти бош котиби ўринбосари Розмари Ди Карло ташриф буюрди.
Саммитнинг асосий тадбирлари эртадан яъни 15 сентябрдан бошланади.
Фарғона вилояти туман ва шаҳарларининг чегараси ўзгартирилишига сенаторлар розилик билдирди
Сенатнинг ўттиз иккинчи ялпи мажлисида «Фарғона вилоятининг Учкўприк, Ўзбекистон, Данғара, Қўштепа, Тошлоқ, Фарғона туманлари ва Қўқон, Марғилон, Фарғона шаҳарлари чегараларини ўзгартириш тўғрисида»ги қарорига оид масала кўриб чиқилди.
Таъкидланишича, бугунги кунда Фарғона вилояти шаҳарлари ва туманларининг чегараларида муаммоли масалалар мавжуд бўлиб, ушбу ҳудудларда истиқомат қилаётган аҳолининг ҳаётида турли қийинчиликларнинг келиб чиқишига сабаб бўлмоқда.
Шу сабабли Ўзбекистон Конституцияси ҳамда «Ўзбекистон Республикасининг маъмурий-ҳудудий тузилиши тўғрисида»ги қонунга асосан Фарғона вилоятининг юқорида қайд этилган туман ва шаҳарлари чегараларини ўзгартириш таклифи илгари сурилмоқда.
Туманлардан шаҳарларга ўтказилаётган аҳолининг уй-жой кадастр ҳужжатлари ва пропискасини қайта расмийлаштириш талаб этилади. Бунда кадастр ҳужжатлари ва пропискани расмийлаштиришда фуқаролардан қўшимча маблағлар талаб этилмайди. Муҳокама этилган масала бўйича Сенатнинг тегишли қарори қабул қилинди.
«Ал-Қоида» 11 сентябрь терактлари ҳақида китоб чиқарди
«Ал-Қоида» ташкилоти 2001 йил 11 сентябрда АҚШда содир этилган террорчилик ҳаракатларига бағишланган китоб чоп этди, деб ёзади «Коммерсантъ».
Китоб терактларга 21 йил тўлишига атаб нашр этилган. Унинг муаллифи сифатида «Ал-Қоида» етакчиларидан бири Абу Муҳаммад ал-Масрий кўрсатилган бўлиб, у 2020 йил Эронда ўлдирилган.
Эслатиб ўтамиз, 2001 йил 11 сентябрь куни тўртта мувофиқлаштирилган террорчилик ҳаракатлари амалга оширилган эди. Террорчиларнинг тўртта гуруҳи — жами 19 киши тўртта йўловчи самолётини эгаллаб олди. Улар иккита лайнерни Нью-Йоркдаги Жаҳон савдо маркази минораларига йўналтирди, учинчиси Пентагон биносига бориб урилди. Тўртинчи авиалайнер йўловчилари ва экипажи террорчилардан самолёт бошқарувини олиб қўйишга уринди ва самолёт Пенсильвания штатидаги далага қулади.
АҚШ «Россиянинг яширинча таъсири» ҳақидаги маърузасини ошкор этдиАҚШ ўз разведкасининг Россия томонидан бошқа мамлакатларнинг «яширинча сиёсий молиялаштирилиши» ҳақидаги маърузасини қисман ошкор қилди, деб ёзади «РБК». Бу ҳақда брифингда Америка маъмуриятининг юқори мансабли вакили маълум қилди.
Мансабдорнинг сўзларига кўра, АҚШ разведкаси аниқлашича, 2014 йилдан буён Россия чет элдаги таъсирини кучайтиришга 300 миллион доллардан ортиқ маблағ сарфлаган. Пуллар 20 дан зиёд мамлакатдаги хориж партиялари, сиёсатчилари ва амалдорларига йўналтирилган, деди у. Айнан қайси мамлакатлар ҳақида гап бораётганига АҚШ президенти маъмурияти аниқлик киритмади.
Изоҳ (0)