АҚШда Япония авиациясининг Пёрл-Харбор базасига ҳужуми чоғида ҳалок бўлган денгизчилардан бири Герберт Жейкобсон орадан 80 йил ўтиб, энди дафн қилинади. Бу ҳақда Associated Press хабар бермоқда.
Жейкобсон 1941 йил 7 декабрда «Оклахома» авианосеци (самолётлар учиши ва қўниши учун мосланган ҳарбий кема)да ҳалок бўлган 400 дан ортиқ денгизчилардан бири бўлган. Қурбонлар жасадларининг бир қисми икки йилдан кейин қидириб топилиб, исмларини аниқламасдан, Гавайи оролларига кўмиб қўйилди. 2003 йилда 100 га яқин жасадлар қолдиқларининг шахсини аниқлашга уриниб кўришди, аммо бу муваффақиятсиз бўлди. 2015 йилда эса Пентагон уларни яна эксгумация қилиб, суд-тиббий экспертиза ёрдамида шахсини таниб олиш жараёнини ўтказишга қарор қилди.
Бу 355 кишининг, шу жумладан, 21 ёшли Жейкобсоннинг шахсини аниқлаш имконини берди. Ҳалок бўлганларнинг бир қисми ўтган йили, ҳужумга 80 йил тўлиши арафасида дафн этилди. Денгизчининг жасади Вашингтондаги Арлингтон қабристонига кўмилади.
Ўтган йиллар давомида Жейкобсоннинг қариндошлари у билан нима юз берганини аниқлашга уринди. Ҳарбий кемадаги сафдошлари билан суҳбатлардан маълум бўлишича, у ҳужум олдидан навбатчиликдан қайтиб келган ва бир неча соат давомида одамларни қирғоққа қараб жўнатган. Бошқа тахминларга кўра эса, у уйқусида, «уруш бўлаётганини тушуниб улгурмасиданоқ» ҳалок бўлган бўлиши ҳам мумкин, деди унинг жияни Бред.
Изоҳ (0)