Қодиров Чеченистон «элита жангчилари» Адам Делимханов бошчилигида Украинага қайтганини маълум қилди

Чеченистон раҳбари Рамзан Қодиров республиканинг Давлат думаси депутати Адам Делимханов бошчилигидаги «элита жангчилари» Украинада «олдинги фронтга қайтгани»ни маълум қилди, деб ёзади Meduza.

«Элита жангчилари украиналик фашистлар томонидан эгаллаб олинган Мариупол, Северодонецк, Лисичанск, Попасной ва бошқа шаҳарлар озод этилганидан кейин олий бош қўмондон томонидан тақдим этилган таътилга чиққан эди, энди эса янги куч билан олдинги фронтга қайтди. Янги тажриба, тоза қурол, тўла ўқдон ва жанговар руҳ билан!» — деб ёзди Қодиров.

У ўз обуначиларидан сабр қилишни ва чеченистонлик жангчилардан «олд фронтдаги аъло даражали натижалар»ни кутишни сўради.

Қодиров эълон қилган видеода Адам Делимханов «Херсон, Запорожье вилоятларида, Донецк халқ республикасида» жами 10 минг нафар чечен ҳарбийлари борлигини айтган.

Делимханов украиналик ҳарбийларни «сюрпризларни кутиб қолишга» чақирди ва бу билан Харьков вилоятида Россия ҳарбийлари чекиниши натижасида украиналиклар, гўёки, «[rossiyalik harbiylar uchun] айни керакли жойга келган».

«Биз кўряпмизки, ижтимоий тармоқларда одамлар жанговар тўқнашувлар бораётган турли вилоятлардаги позицияларда бугун нималар юз бераётганини тушунмаяпти. Барча россияликларни ташвиш чекмасликка ишонтирмоқчиман: биз ғалаба қилишимизга ҳеч қандай шубҳа йўқ», — дейилади Қодировнинг хабарида.

Қодировнинг баёноти россиялик ҳарбийларнинг Харьков вилоятидан чекиниши фонида янгради. 11 сентябрь куни у тарк этилган шаҳарларнинг барчаси «қайтариб олиниши»ни «расман» маълум қилди. Шунингдек, Қодиров, агар «махсус ҳарбий операция»ни олиб бориш стратегияси ўзгартирилмаса, мудофаа вазирлиги раҳбариятига ва мамлакат раҳбариятига» вазиятга ойдинлик киритишига тўғри келишини айтганди.