Украина хавфсизлик кафолатлари ҳақидаги шартнома лойиҳасини ишлаб чиқди. У ҳарбий зарар қопланмагунича, Россияга қарши санкцияларни бекор қилмасликка чақирди

Украина президенти офиси раҳмари Андрей Ермак ва НАТО собиқ бош котиби Андерс Фог Расмуссен Украина хавфсизлик кафолатлари бўйича тавсияларни тақдим этди, деб ёзади Meduza Украина етакчиси офиси матбуот хизматига таяниб.

Тавсиялар Украина президенти Владимир Зеленскийнинг топшириғи билан экспертлар гуруҳи томонидан ишлаб чиқилди. Улар Украина ва унинг хавфсизлиги учун кафил бўлган давлатлар ўртасида стратегик шериклик тўғрисидаги ҳужжат — «Киев хавфсизлик шартномаси»ни тузиш ҳақидаги даъватни ўз ичига олади.

Битим Украинанинг НАТОга қўшилиши ўрнини босмайди, балки шунчаки, бу амалга ошгунига қадар хавфсизликни таъминлаш воситаси бўлиб хизмат қилади.

Иттифоқчиларнинг асосий гуруҳи Украина Қуролли кучларини қўллаб-қувватлаш бўйича мажбуриятларни қабул қилиши, кенгайтирилган гуруҳ эса санкциялар атрофига қурилган ноҳарбий кафолатларни тақдим этиши кутилмоқда.

Тавсиялар қуйидаги кафолатларни кўзда тутади:

• БМТ уставининг 51-моддасига мувофиқ, тажовузкордан ҳимояланиш қобилияти. Бунинг учун иттифоқчилар томонидан Украина мудофаа-саноат мажмуасига инвестициялар, катта кўламли қурол юбориш ва разведка кўмаги, шунингдек, Евроиттифоқ ва НАТО раҳбарлиги остида қўшма ўқув машқлари талаб этилади.
• Янги тажовузга йўл қўймаслик учун ҳарбий, молиявий, инфратузилмавий, техник, ахборот хусусиятига эга олдини олувчи чоралар.
• Тажовузкор мамлакатга қарши санкция пакети , шу жумладан, тажовузкор мамлакат ва унинг чекловлар остига тушган фуқаролари мол-мулкини мусодара қилиш, шунингдек, ушбу активлардан зарарни қоплаш учун фойдаланиш имконини берувчи чоралар.
• Россия Украина хавфсизлигига таҳдид қилишни тўхтатиб, келажакда Украинага ҳужум қилмаслигини кафолатламагунича ҳамда истило чоғида етказилган зарарни қоплаб бермагунича, санкциялар сақланиб қолиши керак.

Истанбулда бўлиб ўтган сўнгги юзма-юз музокараларда Украина НАТО ва бошқа альянсларга қўшилишдан воз кечиш эвазига хавфсизлик кафолатлари тўғрисида шартнома тузишни таклиф этганди. Хавфсизлик кафил мамлакатлар томонидан таъминланиши назарда тутилганди.

Россия ва Украина делегацияларининг Истанбулдаги учрашувидан кейин музокаралар деярли музлатиб қўйилди. 11 сентябрь куни CNN’га берган интервьюсида Украина президенти Владимир Зеленский ҳозирча Владимир Путин билан музокаралар олиб боришга тайёр эмаслигини маълум қилди.

Ўз навбатида, Россия ташқи ишлар вазири Сергей Лавров Москва Киев билан музокаралардан воз кечмаслигини билдирди.