Ukraina prezidenti ofisi rahmari Andrey Yermak va NATO sobiq bosh kotibi Anders Fog Rasmussen Ukraina xavfsizlik kafolatlari bo‘yicha tavsiyalarni taqdim etdi, deb yozadi Meduza Ukraina yetakchisi ofisi matbuot xizmatiga tayanib.
Tavsiyalar Ukraina prezidenti Vladimir Zelenskiyning topshirig‘i bilan ekspertlar guruhi tomonidan ishlab chiqildi. Ular Ukraina va uning xavfsizligi uchun kafil bo‘lgan davlatlar o‘rtasida strategik sheriklik to‘g‘risidagi hujjat — “Kiyev xavfsizlik shartnomasi”ni tuzish haqidagi da’vatni o‘z ichiga oladi.
Bitim Ukrainaning NATOga qo‘shilishi o‘rnini bosmaydi, balki shunchaki, bu amalga oshguniga qadar xavfsizlikni ta’minlash vositasi bo‘lib xizmat qiladi.
Ittifoqchilarning asosiy guruhi Ukraina Qurolli kuchlarini qo‘llab-quvvatlash bo‘yicha majburiyatlarni qabul qilishi, kengaytirilgan guruh esa sanksiyalar atrofiga qurilgan noharbiy kafolatlarni taqdim etishi kutilmoqda.
Tavsiyalar quyidagi kafolatlarni ko‘zda tutadi:
- BMT ustavining 51-moddasiga muvofiq, tajovuzkordan himoyalanish qobiliyati. Buning uchun ittifoqchilar tomonidan Ukraina mudofaa-sanoat majmuasiga investitsiyalar, katta ko‘lamli qurol yuborish va razvedka ko‘magi, shuningdek, Yevroittifoq va NATO rahbarligi ostida qo‘shma o‘quv mashqlari talab etiladi.
- Yangi tajovuzga yo‘l qo‘ymaslik uchun harbiy, moliyaviy, infratuzilmaviy, texnik, axborot xususiyatiga ega oldini oluvchi choralar.
- Tajovuzkor mamlakatga qarshi sanksiya paketi , shu jumladan, tajovuzkor mamlakat va uning cheklovlar ostiga tushgan fuqarolari mol-mulkini musodara qilish, shuningdek, ushbu aktivlardan zararni qoplash uchun foydalanish imkonini beruvchi choralar.
- Rossiya Ukraina xavfsizligiga tahdid qilishni to‘xtatib, kelajakda Ukrainaga hujum qilmasligini kafolatlamagunicha hamda istilo chog‘ida yetkazilgan zararni qoplab bermagunicha, sanksiyalar saqlanib qolishi kerak.
Istanbulda bo‘lib o‘tgan so‘nggi yuzma-yuz muzokaralarda Ukraina NATO va boshqa alyanslarga qo‘shilishdan voz kechish evaziga xavfsizlik kafolatlari to‘g‘risida shartnoma tuzishni taklif etgandi. Xavfsizlik kafil mamlakatlar tomonidan ta’minlanishi nazarda tutilgandi.
Rossiya va Ukraina delegatsiyalarining Istanbuldagi uchrashuvidan keyin muzokaralar deyarli muzlatib qo‘yildi. 11-sentabr kuni CNN’ga bergan intervyusida Ukraina prezidenti Vladimir Zelenskiy hozircha Vladimir Putin bilan muzokaralar olib borishga tayyor emasligini ma’lum qildi.
O‘z navbatida, Rossiya tashqi ishlar vaziri Sergey Lavrov Moskva Kiyev bilan muzokaralardan voz kechmasligini bildirdi.
Izoh (0)