Германия президенти Франк-Валтер Штайнмаер ижара ҳақи ва қўшимча уй-рўзғор харажатлари туфайли мамлакатда уйсизлар сонининг кўпайиши хавфидан огоҳлантирди. Бу ҳақда Deutsche Welle хабар бермоқда.
«‘Қиш инқирози’ яқинлашиб келаётгани, озиқ-овқат, электр энергияси ва иссиқлик таъминоти нархлари ошиши фонида бошпанасизлар муаммоси кескинлашмоқда», — деди давлат раҳбари Уйсизлар куни муносабати билан сўзлаган нутқида.
Президентнинг сўзларига кўра, Германияда 300 мингдан ортиқ одам ўз уйига эга эмас. Улардан деярли 180 минг нафари турли бошпаналарда истиқомат қилади, 45 мингга яқини эса доимий равишда кўчада тунашга мажбур.
«300 мингдан ортиқ — бу жуда кўп. Келгуси ойларда мазкур рақамлар янада ортиши хавфи мавжуд. Уруш ва инқирозлар мамлакатимизда куз-қиш мавсумида янада кўпроқ одамларни уй-жой муаммосига дучор қилиши мумкин», — дея огоҳлантирди Германия президенти. Унинг сўзларига кўра, хавф остида бўлганлар орасида кам таъминланган, нархларнинг ошиши сабаб ижара ҳақини тўлай олмайдиган ёки қўшимча харажатларга дучор бўлган оилалар бор.
Германия ҳукуматининг мақсади 2030 йилгача мамлакатнинг ҳар бир аҳолисини уй-жой билан таъминлаш. Шу сабабли уйсизлар учун махсус уй-жой фонди улушини кўпайтириш орқали турар-жойлар нархини арзонлаштириш зарур», — деди президент.
Июль ойида Германия Федерал Статистика бошқармаси январь ҳолатига кўра, мамлакатда 178 мингга яқин одам бошпана, ётоқхона ва вақтинчалик яшаш жойларида яшаётгани ҳақида хабар берганди. Шу билан бирга, бошқарма дўстлари ёки танишиникидан бошпана топганларни, шунингдек, кўчада яшовчи бошпанасизларни ҳисобга олмаган.
Тадқиқот уйсизларнинг ўртача ёши 32 ёшни ташкил этишини кўрсатди. Бошпанасиз аҳолининг 37 фоизи 25 ёшдан кичик, деярли 5 фоизи 65 ёшдан катта одамлар.
Изоҳ (0)