Germaniya prezidenti Frank-Valter Shtaynmayer ijara haqi va qo‘shimcha uy-ro‘zg‘or xarajatlari tufayli mamlakatda uysizlar sonining ko‘payishi xavfidan ogohlantirdi. Bu haqda Deutsche Welle xabar bermoqda.
“Qish inqirozi’ yaqinlashib kelayotgani, oziq-ovqat, elektr energiyasi va issiqlik ta’minoti narxlari oshishi fonida boshpanasizlar muammosi keskinlashmoqda”, — dedi davlat rahbari Uysizlar kuni munosabati bilan so‘zlagan nutqida.
Prezidentning so‘zlariga ko‘ra, Germaniyada 300 mingdan ortiq odam o‘z uyiga ega emas. Ulardan deyarli 180 ming nafari turli boshpanalarda istiqomat qiladi, 45 mingga yaqini esa doimiy ravishda ko‘chada tunashga majbur.
“300 mingdan ortiq — bu juda ko‘p. Kelgusi oylarda mazkur raqamlar yanada ortishi xavfi mavjud. Urush va inqirozlar mamlakatimizda kuz-qish mavsumida yanada ko‘proq odamlarni uy-joy muammosiga duchor qilishi mumkin”, — deya ogohlantirdi Germaniya prezidenti. Uning so‘zlariga ko‘ra, xavf ostida bo‘lganlar orasida kam ta’minlangan, narxlarning oshishi sabab ijara haqini to‘lay olmaydigan yoki qo‘shimcha xarajatlarga duchor bo‘lgan oilalar bor.
Germaniya hukumatining maqsadi 2030-yilgacha mamlakatning har bir aholisini uy-joy bilan ta’minlash. Shu sababli uysizlar uchun maxsus uy-joy fondi ulushini ko‘paytirish orqali turar-joylar narxini arzonlashtirish zarur”, — dedi prezident.
Iyul oyida Germaniya Federal Statistika boshqarmasi yanvar holatiga ko‘ra, mamlakatda 178 mingga yaqin odam boshpana, yotoqxona va vaqtinchalik yashash joylarida yashayotgani haqida xabar bergandi. Shu bilan birga, boshqarma do‘stlari yoki tanishinikidan boshpana topganlarni, shuningdek, ko‘chada yashovchi boshpanasizlarni hisobga olmagan.
Tadqiqot uysizlarning o‘rtacha yoshi 32 yoshni tashkil etishini ko‘rsatdi. Boshpanasiz aholining 37 foizi 25 yoshdan kichik, deyarli 5 foizi 65 yoshdan katta odamlar.
Izoh (0)