Уруш бошланганидан кейин 10 нафар россиялик Португалия «олтин визаси» учун ариза берган. Уларнинг барчаси рад этилди

2022 йил февраль ойининг охиридан августигача Португалия ҳукумати ўн нафар россияликдан «олтин виза» – инвестициялар эвазига яшаш учун рухсатнома олиш бўйича аризалар қабул қилган.

Publico газетасининг ёзишича, Португалия хорижликлар хизмати ва чегара хизмати Россиянинг Украинага босқинидан кейин Россия фуқароларининг барча аризаларини рад этган.

Португалия ҳукумати уруш бошланганидан икки кун ўтиб, 26 февраль куни россияликларга «олтин визалар» беришни тўхтатган.

Golden Visa Португал дастури 2012 йилдан буён ишлаб келмоқда. Бу дастур мамлакат иқтисодиётига камида 280 минг евро сармоя киритиш орқали Португалияда яшаш учун рухсатнома олиш имконини беради. Февраль ойи охирига қадар жами 431 нафар Россия фуқароси Португалиянинг «олтин визаси»ни олган, улардан етти нафарига визалар 2022 йил бошида берилган. Дастур ишга туширилгандан бери шунингдек, 51 нафар украиналик сармоя эвазига Португалияда яшаш учун рухсатнома олган.

Россиянинг Украинага қарши уруши бошланганидан сўнг, россияликлар учун олтин виза дастурлари, хусусан, Греция, Мальта ва Испанияда ҳам тўхтатилди. Британия урушдан бир ҳафта олдин шундай чорани кўрган.