Москва, Санкт-Петербург ва Колпинонинг 18 та турли округларидан муниципал депутатлар Владимир Путиннинг истеъфосини талаб қилмоқда. Тегишли петиция матни Санкт-Петербург муниципал депутати Ксеня Торстрем томонидан Twitter’да эълон қилинди.
Биз, Россия муниципал депутатлари, президент Владимир Путиннинг хатти-ҳаракатлари Россия ва унинг фуқаролари келажагига зарар етказмоқда деб ҳисоблаймиз. Биз Владимир Путиннинг Россия Федерацияси президенти лавозимидан кетишини талаб қиламиз!»— дейилган петицияда.«Агар сиз муниципал депутат бўлсангиз ва бизга қўшилишни истасангиз, сафимизга хуш келибсиз», — дея мурожаатини якунлаган Торстрем.
Ҳозирга қадар петицияга 20 нафар депутат имзо чеккан.
8 сентябрь куни Москванинг Ломоносовский муниципал округи депутатлари кенгаши Путиндан истеъфога чиқишни сўраган эди.
Уларнинг фикрича, Путиннинг қарашлари ва унинг бошқарув модели «умидсиз даражада эскирган, Россия ва унинг инсоний салоҳияти ривожланишига тўсқинлик қилмоқда». Шу муносабат билан москвалик муниципал депутатлар Россия президентидан «ўзини эгаллаб турган лавозимидан озод қилиш»ни сўраган.
Аввалроқ Санкт-Петербургнинг Смолнинское муниципал округи кенгаши депутатлари Путиндан истеъфо беришни талаб қилган, шу сабабли кейинроқ полицияга чақирилган эди.
Изоҳ (0)