Украина президенти Владимир Зеленский ҳозирда Владимир Путин билан музокарага тайёр эмаслигини айтди. У CNN журналистининг тегишли саволига шундай жавоб берган.
«Бугунги кунларда йўқ. Мен Россия томонидан конструктив бўлиш борасида ҳеч қандай истак кўрмаяпман. Ультиматумларга келсак: ким ультиматум қўйиши муҳим эмас — хоҳ у бўлсин, хоҳ бошқа (Путин президентликдан кетган тақдирда ҳам). Менинг принципим шундай: ультиматум қўядиганлар билан гаплашмайман», — деди Украина президенти.
Зеленскийнинг айтишича, Россия билан келишув Россия томонидан босиб олинган Украина ҳудудлари озод қилинганидан кейингина тузилиши мумкин.
«Нима бўлганда ҳам Россия биз билан чегарадош, барибир у қўшнимиз ва жуда кўп аҳолига эга, шунинг учун мамлакатимиз ишғолдан чиқарилганидан кейин ҳам улар билан қўшни бўлиб яшашга мажбур бўламиз», — деди Украина президенти.
Зеленскийнинг CNN телеканалига берган интервьюси Украина ҳарбийларининг Харьков вилоятидаги муваффақияти фонида чоп этилди. Сентябрь ойида бир неча кун ичида Украина армияси россиялик ҳарбийлар кўп ойлар давомида ушлаб турган Харьковнинг муҳим қисмини озод қилишга муваффақ бўлди. Россия Мудофаа вазирлиги чекинишни Харьковдан «қўшинларни қисқартириш ва кўчириш операцияси» деб атади.
Изоҳ (0)