Украина ҳукумати АҚШдан қўшимча қурол-яроғ, шу жумладан, узоқ масофали ракета тизимлари етказиб беришни сўради. Бу ҳақда Украина ҳукумати Америка конгрессменларига йўллаган ҳужжатда айтилади, деб ёзади Meduza.
The Wall Street Journal қўлига келиб тушган ҳужжатда 29 турдаги қурол-яроғ тизимлари ва ўқ-дорилар келтирилган бўлиб, Киевнинг сўзларига кўра, «2023 йилда ҳужумни давом эттириш» учун у шуларга эҳтиёж сезади.
Рўйхатга 300 километргача масофали ер—ер синфидаги тактик баллистик ракеталар (АТАCМS), танклар, учувчисиз учар қурилмалар, артиллерия тизимлари, «Гарпун» кемага қарши ракеталари, шунингдек, HIMARS баравар ўт очиш реактив тизимлари учун икки мингта ракета кирди.
Қурол-яроғ етказиб бериш ҳақидаги янги сўров Харьков вилоятида Украина кучларининг муваффақиятли қарши ҳужумлари фонида берилди. 1—12 сентябрь кунлари Украина Қуролли кучлари ўз ҳудудининг қарийб 6 минг квадрат километр ҳудудини озод этди, дея маълум қилди Украина мудофаа вазири ўринбосари Анна Маляр.
7 сентябрь куни Украина Қуролли кучлари бош қўмондони генерал Валерий Залужний ва Олий рада мудофаа қўмитаси бошлиғи ўринбосари генерал-лейтенант Михаил Забродский эълон қилган мақолада Украинага урушнинг боришини ўзгартириш учун узоқ масофали қурол-яроғ, шу жумладан, АТАCМS зарурлиги айтилганди.
The Wall Street Journal эслатишича, аввалроқ Вашингтон катта масофали ракета тизимларини Киевга етказиб беришдан бош тортган, чунки Украина улардан Россия ҳудудига зарбалар бериш ва кескинликни оширишда фойдаланишидан хавфсираган эди.
Нашр ҳисоб-китобларига кўра, АҚШ президенти Жо Байден маъмурияти шу пайтгача Украинага 15 миллиард доллардан зиёд қийматда қурол-яроғ ва хавфсизлик соҳасидаги бошқа кўмакларни тақдим этган.
Мавзуга доир:
Изоҳ (0)