Арманистон ҳукумати Озарбайжоннинг Тоғли Қорабоғдаги хатти-ҳаракатлари юзасидан Россияга, Коллектив хавфсизлик шартномаси ташкилоти (КХШТ) ва БМТ Хавфсизлик кенгашига расман мурожаат қилди, деб ёзади «РБК» Арманистон Жамоатчилик телевидениесига таяниб.
13 сентябрга ўтар кечаси Арманистон Хавфсизлик кенгаши бош вазир Никол Пашинян раислиги остида йиғилиш ўтказиб, «Озарбайжоннинг Арманистон суверен ҳудудига қарши тажовузкор ҳаракатлари»га қарши туриш бўйича кейинги қадамларни муҳокама қилди.
Ўшанда Ереван Москвадан Дўстлик, ҳамкорлик ва ўзаро кўмак тўғрисидаги шартнома низомларини кучга киритишни сўрашини, шунингдек, КХШТ ва БМТ Хавфсизлик кенгашига мурожаат қилишини эълон қилганди.
АҚШ давлат котиби Энтони Блинкен маълум қилишича, Вашингтон Арманистон-Озарбайжон чегарасидаги ҳарбий ҳаракатлар ҳақидаги хабарлардан, шу жумладан, Арманистондаги аҳоли пунктлари ва фуқаролик инфратузилмасига берилаётган зарбалар ҳақидаги ахборотдан хавотирда.
«Аввал ҳам очиқчасига айтганимиздек, низонинг ечими ҳарбий бўлиши мумкин эмас. Ҳар қандай жанговар ҳаракатларни зудлик билан тўхтатишга қатъиян даъват этамиз», — дейилади хабарда.
Аввалроқ Арманистон Мудофаа вазирлиги 13 сентябрь куни ярим тундан кейин Озарбайжон қўшинлари республика жануби-шарқидаги Сотк, Горис ва Жермук аҳоли пунктларини артиллерия ва йирик калибрли қуроллардан ўққа тутишни бошлаганини маълум қилганди.
Пашинян Россия президенти Владимир Путин билан телефон орқали суҳбатлашиб, Бокунинг хатти-ҳаракатларини номақбул деб атади. Пашинян матбуот хизмати етакчилар тезкор алоқани сақлаб туришга келишиб олганини маълум қилди.
Озарбайжон Мудофаа вазирлиги Арманистонга бостириб киргани ҳақидаги маълумотларни бемаъни деб атаб, вазият кескинлашуви учун жавобгарликни Ереван зиммасига юклади.
Изоҳ (0)