Наманган вилояти Уйчи туманида аҳоли бандлигига кўмаклашиш маркази директори ушланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департамент ҳамда ДХХнинг Уйчи тумани бўлимлари томонидан тезкор тадбир ўтказилган. Унда Уйчи туман Аҳоли бандлигига кўмаклашиш маркази директори С.А. 2 нафар фуқарони ушбу марказга ишга қабул қилишни ваъда қилгани аниқланган. У хизмати эвазига ўз хонасида 200 доллар ва 2,2 миллион сўмни олган вақтида ашёвий далиллар билан ушланган.
Шунингдек, олиб борилган терговга қадар текширувлар давомида С.А фуқаро Х.дан 18 нафар фуқарони расмий ишсизлар рўйхатига киритиб қўйиш учун муқаддам 1,8 миллион сўм олгани аниқланиб, шундан 100 доллар ва 600 минг сўмни қайтаргани процессуал тартибда расмийлаштирилган.
Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилган. Ҳозирда тергов ҳаракатлари ўтказилмоқда.
Изоҳ (0)