Фарғона вилояти Ёзёвон ва Бухоро вилояти Қоракўл туманларида кредит маблағларини талон-торож қилган шахслар аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Ёзёвон туман бўлими томонидан терговга қадар текширув ўтказилган. Унда, Қ.С. МЧЖ раҳбари А.Х. ҳудудий тижорат банки филиали масъуллари билан ўзаро тил бириктириб, 55 нафар фуқарога 10 сотихдан ер майдони ажратиб, уларнинг номларига экин уруғи сотиб олиш учун 165 млн сўм имтиёзли кредит ажратилишига эришгани аниқланган. У ушбу маблағларни МЧЖга ўтказиш орқали талон-торож қилган.
Шунингдек, Қоракўл туман бўлими томонидан ўтказилган терговга қадар текширувда муқаддам фирибгарлик жинояти учун судланган I.О. фуқаро Б.нинг имзосини сохталаштиргани маълум бўлган. У фуқаро Б. номидан тижорат банки филиалидан 92,5 миллион сўм кредит ажратилишига эришиб, ушбу кредит маблағи эвазига таъминотчи корхона томонидан берилган майда шохли молларни фирибгарлик йўли билан қўлга киритган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)