Мансур Агалиев, Ҳалима Ибрагимова, Муқаддас Саъдуллаева ва бошқа ўзбек санъаткорларининг томошабин пайқамаган роллари (фото, видео)

Ҳеч бир санъаткор бир уринишда машҳурлик чўққисини забт этмайди. У биргина қўшиғи халқ оғзига тушгунига қадар камида 5-6 та қўшиқ устида ишлаган ёки роли муваффақиятли чиқиши учун бир нечта фильмларда ўзини синаб кўрган бўлади.

Клип ёки фильмда рол ижро этган бўлса-да, унда бор-йўқлиги ҳам сезилмаган ижодкорлар талайгина. «Дарё» мухбири Наргизахон Муродова клип ва фильмларда кўз илғамас ролларни ижро этган ва бугунги кунда машҳурлик чўққисини забт этган ижодкорлар ҳақида маълумот тўплади.

Шаҳло Зоирова

Комик актрисани «Миллион» жамоасидаги иштирокидан сўнг халққа танилган. Аммо у ундан аввал кўплаб фильмларда ва клипларда эпизод ролларни ижро этган.

Масалан, комик актриса Дилфуза Исмоилованинг «Оҳ, юрак» клипида раққоса сифатида иштирок этган. Аммо бир гуруҳ қизлар орасида унинг бор-йўқлиги ҳам сезилмаган.

2011 йили Жавлон Шодмонов режиссёрлигида суратга олинган «Ўхшатмасдан учратмас» фильмидаги ҳам эпизод роллардан бирини ижро этган. Аммо ижодкорнинг бу фильмдаги ролини ҳам деярли томошабинлар пайқамаган. Ҳозирги кунда эса актрисанинг клип ёки фильмдаги кичик роллари ҳам катта шов-шувларга сабаб бўлади.

Меҳриддин Раҳматов

Ўзбекистонда хизмат кўрсатган артист Меҳриддин Раҳматовни масъул лавозимларда ишлайдиган инсонлар ролида кўришга ўрганиб қолганмиз. У фаолияти давомида ҳарбий хизматчилар ролини ҳам кўп марта ижро этган. Аммо унинг илк ролида гиёҳвандликка ружу қўйган инсон гавдалантирилган.

Унинг илк ролини «Шайтанат» сериалида ижро этган. Аммо унинг иштирокини томошабин пайқамаган бўлиши табиий ҳол. Актёрнинг айтишича, у институтдаги курс раҳбатининг тавсиясига кўра сериал съёмкасида иштирок этган. Аммо суратга олиш майдончасига боргунга қадар қандай ролни ижро этишини билмаган.

Жаҳонгир Позилжонов

Комик актёр Жаҳонгир Позилжонов илк ролини қайси фильмда ижро этганлигини биласизми? Кўпчилик уни «Севинч» фильмидаги роли орқали танийди. Аммо у илк ролини режиссёр Рустам Саъдиевнинг «Муҳаббат синовлари 2 « фильмида ижро этган. Аммо ижодкорнинг мазкур фильмдаги иштироки деярли сезилмаган.

Бу фильмда қарздор ролини ижро этган Жаҳонгир Позилжоновга кўпроқ комик роллар ярашади. Унинг 2004 йилда суратга олинган «Севинч» фильмидаги роли томошабинлар эътиборига тушган.

Муҳаммадисо Абдулхаиров

Ҳозирги кунларда фильм ва сериалларда анчайин фаол бўлган актёр Муҳаммадисо Абдулҳайиров бир пайтлар марҳум хонанда Лайлонинг «Сенла биргамиз» клипида рол ижро этганини кўпчилик билмаса керак.

Юлдуз Ражабова

Айни кунларда «Мендирман Жалолиддин» сериалининг янги мавсумида суратга тушаётган актриса Юлдуз Ражабовани кўпчилик «Ҳазон» ва «Турист» фильмларидан сўнг таниган. Аммо унгача актриса кўплаб клипларда ҳам суратга тушган. Масалан, у Маҳмуд Намзовнинг «Кўза афсонаси» қўшиғига ишланган клипда соҳибжамол ва илон ролларини ижро этган. Аммо кўпчилик томошабинлар буни пайқашмаган.

Ушбу клипда Юлдуз Ражабова ташқи кўринишини ўзгартириш хусусиятига эга мистик қаҳрамон ролини ижро этган.

Алишер Узоқов

Актёр илк ролини гўдаклик чоғида «Кунда» видеофильмида ижро этган. Ундан кейинги ролини эса «Остона» фильмида яратган. У пайтда анча ёш эди. Шу боисданми томошабинлар унинг Алишер Узоқов эканини танишмаган бўлса ҳам керак.

Муқаддас Саъдуллаева

Актриса Муқаддас Саъдуллаева ҳам илк ролини болалик чоғида ижро этган.У актёр ва режиссёр Машраб Кимсанов томонидан суратга олинган «Беш қисмат» фильмида онаси Гулчеҳра Саъдуллаеванинг кенжа қизи ролини ижро этган. Аммо кўпчилик томшабинлар ретро фильмни кўриб, бу болакай Муқаддас Саъдуллаева эканига ишонишмаса керак.

Ҳалима Иброҳимова

Комик актриса илк ролини 2006 йилда «Анора» фильмида ижро этган. Ундан сўнг Бурҳон Шароповнинг «Ниқоб» фильмида ҳам кичик эпизод ролни ижро этган. Актриса фаолиятини жанжалкаш аёллар ролидан бошлагани учунми унга бирорта фильмда оғир-босиқ аёл ролини беришмайди.

Жаъфар Мўминов

Айни кунларда оила билан АҚШда яшаб, ижод қилаётган актёр Жаъфар Мўминов илк ролини «Суғдиёна» фильмида ижро этган. Томошабинлар унинг ролини пайқамагани аниқ. Боиси у оддий бармен йигит ролида суратга тушган.

Муниса Ризаева

У машҳурликка эришмасидан аввал бир нечта фильмларда суратга тушганидан хабарингиз бор. Унинг яратган роллари озми-кўпми машҳурликка ҳам эришган. Аммо «Ҳай-ҳай қизалоқ» фильмидаги роли томошабин эътиборига тушмаган дейиш мумкин. У фильмда ёнғин сабаб юзи куйган Ҳолида исмли қиз ролини ижро этган.

Мансур Агалиев

Ўзбекистон халқ артисти Юлдуз Усмонованинг турмуш ўртоғи ва унинг продюссер Мансур Агалиев ҳам бир пайтлар фильмларда эпизод ролларни ижро этган. У илк ролини Мурод Ражабовнинг «Улфатлар» фильмида ижро этган.

Шаҳзода Муҳаммедова

Таниқли актриса, дизайнер ва бошловчи Шаҳзода Муҳаммедова «Омад» фильмида Бобур Йўлдошевнинг тили заҳар котибаси ролини ижро этган. Асосий ролларни Убайдулло Омон, Бобур Йўлдошев ҳамда Ирода Носирова ижро этгани учун Шаҳзода унчалик кўзга ташланмаган.

Мавзуга доир:

• Паризода, Жаҳонгир Отажонов, Каниза ҳамда ўғирлик қурбони бўлган бошқа ўзбекистонлик санъаткорлар (видео)
• «Қироличам», «Онам, касалман деманг» ва ижоддаги сукунатдан сўнг мухлислар эътиборига ҳавола этилган бошқа хит қўшиқлар (видео)
• Голливуднинг 700 минг доллар гонораридан воз кечган, Азиз Раметовнинг севгисини рад этган, съёмка жараёнида бир ўлимдан қолган Ситора Фармонова 38 ёшда (фото)