8 сентябрь кундуз пайти Букингем қасрининг расмий сайтида Елизавета II нинг саломатлиги ёмонлашгани ҳақидаги хабар пайдо бўлди. Ушбу хабар дунё бўйлаб барча оммавий ахборот воситалари ўртасидаги ажиотажни юзага келтирди.
Маълумки, монархнинг ўлими ҳақидаги янгиликни биринчи бўлиб қироллик оиласи аъзолари тасдиқлаганидан сўнг BBC журналистлари чоп этади. Шунингдек, сир эмаски, қаср ходимлари, қариндошлар ҳамда Британия амалдорларида қиролича вафот этган тақдирда нима қилиш бўйича аниқ йўриқнома мавжуд.
Елизавета II 70 йилдан ортиқ тахтда ўтиргани инобатга олинса, бундай тайёргарлик тўлақонли мантиқан қабул қилиниши турган гап. Аммо гап фақат бунда эмас. Қиролича ёшлик даврида яқинларининг ўлимига тайёр эмаслиги қандай оқибатларга олиб келиши мумкинлиги билан тўқнаш келган. Ўшанда бу қўрқинчли ҳолат унинг ҳаётида катта из қолдирган. Grazia нашри воқеа тафсилотлари билан бўлишди.
1952 йилда Елизавета турмуш ўртоғи Филипп билан бирга Кенияга борган. Ўшанда унинг отаси қирол Георг VI нинг саломатлиги ёмонлашгани ҳақида гап-сўзлар тарқалган эди. Бироқ қирол ўз хизмат вазифаларини адо этаётган эди. Шунинг учун Елизавета отасининг қўққисдан вафот этиши мумкинлигига ишонмаган. Бироқ 6 февралга ўтар кечаси қирол вафот этган. Бу янгилик Елизаветага кечикиб етиб борган.
Елизавета нима қилиши кераклигини яхши тушунарди. Бироқ тўсатдан келган шумхабар туфайли унда отаси учун қайғуриб, кўз ёш тўкиш учун бир дақиқа ҳам йўқ эди. Елизаветага отасининг ўлими ҳақида хабар берган гувоҳларнинг сўзларига кўра, малика ушбу хабарни эшитиши биланоқ иш столига ўтирган ҳамда сўнгги воқелар муносабати билан турни давом эттира олмаслигини ҳамда узрини айтиб юзлаб хатлар ёзишга тушган.
Шундан сўнг Елизавета ва Филипп Буюк Британияга йўл олган. Ўшанда папарациялар ҳозирги кундагидан камроқ бўлса ҳам, журналистлар самолёт трапидан мотам либосида эмас, оддий кўйлакда тушиб келаётган маликани суратга олишга муваффақ бўлган. Бу эса, табиийки, катта можарони келтириб чиқарган.
Шу воқеадан сўнг Елизавета нафақат ўз ўлими, балки бошқаларнинг ҳам ўлимига тайёргарлик кўра бошлаган.
Маълумки, у ҳар бир сафарга ҳеч бўлмаганда битта мотам либосини олиб кетарди. Ўз ўлимидан кейинги ҳаракатлар режаси ҳам айнан у томонидан тасдиқланган эди.
Мавзуга доир: Қиролича Елизавета II нинг мода тарихида ўчмас из қолдирган энг ёрқин образлари (фото)