«Ишини эплолмаса, ҳокимни алмаштиришнинг нима кераги бор?»— фаоллар Чилонзордаги 58 туп дарахт ноқонуний кесиб ташланганига муносабат билдирди

Ижтимоий тармоқларда 7 сентябрь куни Тошкент шаҳрининг Чилонзор туманида қурилиш корхонаси томонидан кўп йиллик манзарали дарахтлар ноқонуний кесиб юборилгани ҳақида хабар тарқалди. «Дарё» мухбири ҳолатни ўрганиш мақсадида воқеа жойида бўлди.

Маълум бўлишича, Чилонзор кўчасида жойлашган 20 сотихли майдон Dream House Stroy МЧЖга тегишли бўлиб, ташкилот дарахтларни кесмаслик юзасидан қонунчиликда белгиланган тартибда огоҳлантирилган. Аммо корхона қонуний талабларни бажармаган ва ҳудуддаги 58 туп ҳар хил турдаги манзарали дарахтларни кесиб ташлаган.

Тошкент шаҳар Экология ва атроф-муҳитни муҳофаза қилиш бошқармаси бошлиғи Фарҳод Деҳқонов ҳолат юзасидан ахборот берди.

«Воқеа Чилонзор кўчасидаги меҳмонхона қурилиши учун олинган ерда содир бўлган. Ушбу қурилиш объекти бир неча йилдан бери қаттиқ назорат остида. Туман қурилиш бўлими, Экология қўмитаси вакиллари бу ерда 58 туп турли катталикдаги дарахтлар хатловини амалга оширган. Ҳудуддаги дарахтларни кесмаслик бўйича Dream House Stroy МЧЖ раҳбариятидан кафолат хатлари олганмиз. Майдон атрофи ноқонуний тартибда бир неча марта ўраб олинган. Тўғри, 2-3 марта майдонни очтирдик. Лекин яна темир тўсиқларни қайта тиклаб, 6-7 метр баландликда ўраб олишган. Ичидаги дарахтлар ҳам беркитилган. Афсуски, 7 сентябрга ўтар кечаси, тунда тадбиркор томонидан дарахтларни қонунга зид равишда кесиб ташлаш ҳолати рўй берди. Ҳолат юзасидан Жиноят кодексининг 198-моддаси билан жиноят иши қўзғатиш бўйича Тошкент шаҳар прокуратурасига материаллар киритдик. Ўйлаймизки, ҳуқуқбузарларга нисбатан қаттиқ жазо чораларини қўллашади. Бирламчи ҳисоб-китобларга қараганда, дарахтлар кесилиши оқибатида табиатга 797 миллион сўмдан ортиқ моддий зарар етказилгани аниқланди», — деди қўмита масъули.

Олий Мажлис Қонунчилик палатаси депутати, Давлат экология қўмитаси ҳузуридаги жамоатчилик кенгаши аъзоси Расул Кушербаев воқеа юзасидан ўз муносабатини билдирди.

«Бу ноқонуний иш туман прокуратурасининг рўпарасида содир этилган. Тадбиркор табиатга салкам 800 миллион сўм зарар етказган. Бу зарар эса давлат корхонаси бўлган Ободонлаштириш ҳисобидан қопланяпти. Яъни улар кесилган дарахтлар ўрнига янги ниҳоллар экмоқда. Бу нима мантиқсизлик? Одамлар билиб қўйсин бизнинг табиатимиз келажагига душманлик қилаётганлар кимлар эканини. Бу ерда мораторий ва қонун талабларига амал қилинмаяпти. Ўзи Чилонзорда ноқонуний дарахт кесилиши сабабли раҳбариятга чора кўрилганди. Бугун дарахт кесиш мумкин эмас, бу тақиқланган. Шундай дарахтзорни бундай аҳволга солиш нотўғри. Келажакка нима қолдиряпмиз ўзи? Бу жой муҳофазага олинган эди. Бу ҳолат тадбиркорнинг давлат ва жамиятга қилган муносабатидир. Бу жуда уятли иш.

Чилонзор туманига янги ҳоким ва прокурорлар келди. Лекин ҳеч нарсада ўзгариш бўлмади. Айнан улар келдими, келмадими, Чилонзорда дарахт кесиш тўхтамаган. Улар нима иш қиляпти ўзи? Агар улар ҳеч қанақа ўзгариш қилмаса, бунақа кадрларни алмаштиришнинг нима кераги бор? Олдинги раҳбарият нима учун кетди? Айнан шу дарахт масаласи учун кетди. Кейингиси келди. Унинг даврида дарахт кесилиши янада авж олди. Нима кераги бор бунақа раҳбариятни бизга? Мен шахсан минглаб одамлар номидан айтаман: бизларга бунақа раҳбарлар керак эмас? Табиатни асраб бера олмайдиган, кўзбўямачилик қилиб юраверадиган ходимлардан мен норозиман, улар бизга керак эмас. Ундан кўра фаолларни ўзига қўйиб берсин, табиатни ўзлари асрайди. Бунга, албатта, жиноят иши қўзғатилиши керак», — деди Расул Кушербаев.

Экология ва атроф-муҳитни муҳофаза қилиш давлат қўмитаси раиси ўринбосари Исломбек Боқижоновнинг айтишича, пойтахтда бу каби атрофи ўраб олинган майдонлар юзлаб топилади.

«Тошкент шаҳрида бу каби атрофи ноқонуний ўраб олинган қурилиш объектлари сони 700 тани ташкил этмоқда. Уларда 5 минг 500 тадан ортиқ дарахт мавжуд. Дарахтлар қандай суғорилмоқда, қай тарзда парвариш қилинмоқда, била олмаймиз. Чунки у — тадбиркорнинг ҳудуди. Дарахт кесилсагина, ичкарига кира оламиз. Лекин унда кеч бўлади. Мана бу ҳолат бир кечада содир бўлди. Эрталаб келсангиз дарахтлар йўқ. Яна ҳам буни йил бошида хатлов қилиб қўйгандик. Тадбиркорнинг ўзи бу дарахтларни кесмаймиз деб кафолат хати ёзиб берганди. Шундай ҳолатда ҳам 58 та дарахтни бир кечада нобуд қилган», — дейди қўмита расмийси.

Аввалроқ Чилонзор туманида йўл таъмирлаш ишлари сабаб йўл чеккасидаги дарахтлар илдизига шикаст етказилганди. Шу билан бирга,  Фарғонада ҳам бир қанча дарахтлар кесиб ташлангани хабар қилинганди