Россия Европа Иттифоқи (ЕИ) ҳарбий раҳбарияти вакилларини қора рўйхатга киритишга қарор қилди. Бунга уларнинг ташаббуси билан Украинага ҳарбий юк етказиб берилаётгани сабаб бўлган. Тегишли баёнот Россия Ташқи ишлар вазирлигида эълон қилинди.
«Чекловлар, хусусан, Европа Иттифоқининг олий ҳарбий раҳбариятига, ЕИга аъзо давлатлар ҳуқуқ-тартибот идораларининг юқори мартабали ходимларига, Украинага ҳарбий маҳсулотлар етказиб бериш билан шуғулланувчи Европанинг қурол ва ҳарбий техника ишлаб чиқариш соҳасидаги тижорий ташкилотлари вакилларига тааллуқлидир», — дейилади хабарда.
Ушбу рўйхатга киритилган шахсларга Россия ҳудудига кириш тақиқланади. Тегишли оғзаки нота аллақачон ЕИнинг Россиядаги делегациясига юборилган.
«Россияга қарши чора-тадбирлар ташаббускорларига эслатмоқчимизки, ҳар қандай дўстона бўлмаган ҳаракатларга кескин жавоб қайтаришда давом этамиз», — дейилади баёнотда.
Изоҳ (0)