Ўзбекистон ва Италия ўсимликларни ҳимоя қилиш бўйича ҳамкорлик ўрнатади

Ўзбекистоннинг Италиядаги элчихонаси томонидан Италия Миллий тадқиқотлар кенгашининг Ўсимликларни барқарор ҳимоя қилиш институти директори Мауро Чентритто ва Ўзбекистон ўсимликлар ҳимояси ва карантини илмий-тадқиқот институти директори Азим Анорбоев ўртасида видеоалоқа воситасида учрашув ташкил этилди, деб хабар бермоқда «Дунё».

Учрашув аввалида Италия томонига Ўзбекистонда қишлоқ хўжалиги йўналишида амалга оширилаётган ишлар тўғрисидаги атрофлича маълумотлар тақдим этилди. Хусусан, мамлакатда ўсимликлар карантини ва ҳимояси тизимини янада такомиллаштириш, фитосанитар ва озиқ-овқат хавфсизлигини таъминлаш ҳамда экспорт салоҳиятини кенгайтириш борасида эътиборга молик ишлар олиб борилаётгани таъкидланди.

Учрашув доирасида Ўзбекистон ўсимликларни ҳимоя қилиш ва карантини илмий-тадқиқот институтининг мақсади, илмий фаолияти, амалга оширилаётган лойиҳалар ва халқаро алоқалар тўғрисидаги тақдимот ўтказилди. Ушбу институтнинг илмий ходимлари нуфузли халқаро ташкилотлар ва донорлар, хусусан, БМТ Тараққиёт дастури, Озиқ-овқат ва қишлоқ хўжалиги ташкилоти доирасида ташкил этиладиган халқаро семинар ва тадбирларда фаол қатнашиб келаётгани қайд этилди. Олимлар томонидан халқаро конференция ва журналларда илмий мақолалар чоп этилмоқда. Институтнинг моддий-техник базасини мустаҳкамлаш борасида халқаро молия институтлари билан фаол ҳамкорлик йўлга қўйилган.

Ўз навбатида, Италия ўсимликларни барқарор ҳимоя қилиш институти вакили ташкилот томонидан амалга оширилаётган илмий изланишлар ва халқаро ҳамкорлик борасидаги фикрларини баён этди.

Икки давлат ўртасида ўсимликларни ҳимоя қилиш борасида ҳамкорлик илмий ва амалий жиҳатдан юқори истиқболга эга экани қайд этилди. Бу борада ўсимлик зараркунандалари хавфини таҳлил қилиш, шунингдек, фитосанитария хатарларини бошқариш, ўсимликларни ҳимоя қилишнинг турли йўналишлари бўйича йўриқномалар тайёрлаш, экологик тоза кимёвий моддаларни қўллаш орқали ўсимликларни самарали зарарсизлантириш усулларини ишлаб чиқиш, зараркунандаларга қарши курашнинг биологик усулларини ишлаб чиқиш ҳамда уруғлик ва экиш материаллари сифатини яхшилаш бўйича тадқиқотлар ўтказиш борасида ўзаро ҳамкорлик қилиш мақсадга мувофиқ экани билдирилди.

Музокаралар чоғида Италияда ўзбек мутахассислари ва экспертларининг ўсимликларни ҳимоя қилиш ва карантин бўйича билим ва тажрибасини оширишда амалий ёрдам беришга тайёрлик маълум қилинди. Ушбу масалалар юзасидан томонлар яқин муддат ичида англашув меморандумини ишлаб чиқиш ва имзолашга келишиб олди.