Фарғона вилоятининг Ўзбекистон туманида 2022 йилнинг 21 июль куни бахтсиз ҳодиса оқибатида мактабгача таълим ташкилотининг 4 ёшли тарбияланувчиси вафот этгани ҳақида хабар берилган эди.
Мактабгача таълим вазирлиги ахборот хизматининг маълум қилишича, бахтсиз ҳодиса содир бўлган кун соат тахминан 08:30 да болани катта опаси 23-сонли ДМТТ тарбиячилари ихтиёрига олиб келиб берган. Орадан маълум вақт ўтгач, мазкур мактабгача таълим ташкилоти тарбиячилари ва раҳбарининг бепарво ва лоқайд муносабати оқибатида тарбияланувчи МТТ ҳудудидан рухсатсиз чиқиб, опасининг орқасидан югурган. Ҳаракат оқибатида бахтсиз тасодиф билан сирпаниб, уйи яқинидан оқиб ўтувчи «Собиржон» дарёсига йиқилиб тушиб, чўкиб кетган.
«Дарё» мухбири бахтсиз ҳодиса тафсилотларига ойдинлик киритиш мақсадида Ўзбекистон туманида бўлиб, мактабгача таълим ташкилоти масъуллари ва гувоҳлар билан суҳбатлашди.
Маълум бўлишича, 23-давлат мактабгача таълим ташкилоти Ўзбекистон туманининг «Қум» маҳалла фуқаролар йиғинида жойлашган. Ҳозирги кунда 90 ўринга мўлжалланган боғчада 3 та гуруҳда 90 нафар бола мактабгача таълимга қамраб олинган. Бу ерда 21 нафар ходим фаолият юритади. Мактабгача таълим ташкилотининг собиқ мудираси Моҳира Султонованинг маълум қилишича, бахтсиз ҳодиса юз берган кунларда у меҳнат таътилида бўлган.
Май ойида бизда ‘Хайр боғча’ тадбири бўлди. Шундан кейин бўшаган ўринларга янги тарбияланувчиларни қабул қилганмиз. Июнь ойида Давлат хизматлари марказига бориб, ҳамма болаларнинг йўлланмаларини ўзим чиқариб келганман. Шу болаларнинг ичида Муҳаммад Акбар ҳам бор экан. Боғчага бир-бир ярим ой қатнаганидан кейин шу воқеа содир бўлди. Ўша куни ишхонада эмасдим. 16 июль кунидан меҳнат таътилига чиққандим. Эрталаб шунақа иш бўлди, деб телефон қилишганди, тезда етиб келдим. Тарбиячилардан нима бўлганини суриштирдим. Эрталаб Муҳаммад Акбарни боғчага опаси олиб келган экан. У боғчада қолишни хоҳламасдан, опасига эргашибди. Тарбиячиси орқасидан бориб, болани олиб қолишга ҳаракат қилибди. Опаси, йўқ олиб кетавераман, йиғлаяпти, барибир қолмайди, деб олиб кетибди.Бола тарбияланган кичик гуруҳ тарбиячиси Шарифахон Мўминованинг таъкидлашича, ўша куни эрталаб бола боғчага келган, лекин қолишни истамасдан, опаси билан уйига қайтиб кетган. Бахтсиз ҳодиса ҳам боғча яқинида эмас, балки боланинг уйи атрофида содир бўлган.Боғчадан чиқиб кетганидан кейин улар уйларига борган экан. Холалари, қариндошлари болалари билан меҳмонга келган. Ўшалар билан кўчага чиқиб, ўйнаётган вақтида оёғи сирпаниб, сойга тушиб кетибди. 21 июль куни эрталаб бола ҳақиқатан ҳам боғчага келган. Кейин йиғлаб, опасининг орқасидан эргашиб чиқиб кетган. Ўша куни унинг исм-фамилияси йўқлама дафтарига қайд этилмаган», — дейди Моҳира Султонова.
Ўрта кичик гуруҳда ёрдамчи тарбиячи бўлиб ишлайман. Ўша куни ишга келиб, болаларни қабул қилиб олаётган эдим. Гуруҳлар алмашгани учун янги болалар кўп эди. Бошида уларни боғчага кўникиши қийин бўлади. Йиғлаган болаларни кўндириб тургандим. Муҳаммад Акбарни опаси олиб келди. У боғчада қолишни хоҳламасдан, орқага тисарилди. Қўлимдаги болани қўйиб, келинг Муҳаммад Акбар деб олдига бордим. Барибир кўнмади, опасини қўлидан чиқиб, кўчага қочиб кетди. Орқасидан опаси чиқди. Мен ҳам болаларни ёрдамчимга қолдириб, уларнинг орқасидан кўчага югуриб чиқдим. Шунда ҳам бола қолишни истамади. Опаси ҳам қўяверинг, уйга қайтариб олиб кетаман деди. Ўша пайт телефон қилиб, бу ҳақда ота-онасини огоҳлантириб қўйиш хаёлимга келмабди. Ярим соат, бир соатдан кейин шу хабар келди. Бола сойга оқиб кетибди, дейишди. Кейинроқ бувиси ҳам боғчага келди, жаҳл устида бизга эътироз ҳам билдирди. Лекин ўша куни набираси боғчадан чиқиб, уйга қайтиб борганини айтди», — дейди гуруҳ тарбиячиси Шарифахон Мўминова.«Қум» маҳалла фуқаролар йиғини раиси Шавкатжон Эргашевнинг айтишича, сойга оқиб кетган болани 40-50 нафар маҳалладошлар 2-3 соат давомида қидирган. Афсуски, бола қўшни туман ҳудудида нобуд бўлган ҳолда топилган.
Ўша куни соат 9:00 лар атрофида менга қўшнилари телефон қилиб, Шерзоджоннинг ўғли сойга тушиб оқиб кетганини айтишди. Уларнинг ҳовлиси ишхонамизга яқин эди, ораси 200-300 метр чиқади. Дарров етиб бордим. Уйларига кирсам, холаси ўтирибди. Қолганлар болани қидириш учун сой томонга кетишган экан. Сойга тушсам, воқеа жойини кўрсатиб, мана шу ерда ўтни ушлаб, сирпаниб тушиб кетди дейишди. Ўша кунлари пахтага сув қўйиладиган пайт эди, бу сойда жуда катта сув бўлган. Сувчиларга телефон қилдик, сувни тўхтатиб туриш учун. Сувни беркитишганидан кейин болани 40-50 киши 2-3 соат давомида қидирдик. Афсуски, бола Учкўприк туманининг Тошкентлигузар маҳалласидаги сув ўтказиш дарвозасидан нобуд бўлган ҳолда топилди», — дейди маҳалла раиси Шавкатжон Эргашев.Сувга чўкиб кетган боланинг бувисига кўра, ўша куни набираси боғчада қолмасдан, уйга қайтиб келган. Боғча ходимларининг болаларга нисбатан эътиборсизлиги эса илгари ҳам бир неча марта кузатилган.
Ўша куни набирамни боғчага 5-синфда ўқийдиган опаси олиб кирган. Тарбиячиларни олдига олиб борган. Бешта тарбиячи қараб турган экан. Ташлабди-ю, чиқаверибди. Орқасидан укаси ҳам қайтиб чиққан. Йигирма метрча бу ёққа келганда, тарбиячиси чиқиб, укангизни олиб келинг деган. Опаси қайтариб олиб кетавераман, энди кирмайди, дебди. Кейин қайтиб олиб келаверган. Шу ердан ўтиб, бизнинг ҳовлимизга кирибди. Мен ҳам уйда йўқ эдим. Бўлмаса ўзим қайтариб олиб кирардим боғчага. Аяси ҳам билмаганда, уни боғчадан қайтиб чиққанини. Анави ерда сой бор. Кейин ўша томонга ўтиб, сойга бориб ўйнаб, сирпаниб кетибди. Шу билан оқиб кетибди катта сойда. 3-4 кун ўтгандан кейин боғчага кириб, тарбиячиларга эътироз билдириб чиқдим. Бир марта боғчага набираларим билан ўзим бирга боргандим. Опаси тарбиячиларни олдига олиб кирса, улар қарашмабди. Укасини ташлаб, дарвозани олдига қайтиб чиқди. Укаси ҳам орқасидан чиқиб, кирмайман деди. Кейин ўзим олиб кириб, нимага келган болага қарамайсизлар, нима учун бееътиборсизлар деб эътироз билдиргандим», — дейди марҳум боланинг бувисиМактабгача таълим вазирлиги ахборот хизматининг маълум қилишича, мазкур маълумот вазирликка келиб тушиши биланоқ барча ҳолатларга ойдинлик киритиш мақсадида зудлик билан комплекс текшириш ишлари бошланган. Текширув давомида ушбу ташкилот ходимлари касбий фаолияти жараёнида қўпол қоидабузарликларга йўл қўйгани аниқланган. Жумладан, улар болаларнинг боғча ҳудудидан рухсатсиз чиқиб кетишига бепарво қараган.
Натижада ҳуқуқни муҳофаза қилиш органлари томонидан ушбу мактабгача таълим ташкилотининг барча мансабдор шахслари ва ходимларига нисбатан Жиноят кодексининг 116-моддаси (касб юзасидан ўз вазифаларини лозим даражада бажармаслик) 3-қисми билан терговга қадар жиноят иши қўзғатилган.
Ўзбекистон туманидаги 23-давлат мактабгача таълим ташкилотида юз берган воқеа ижтимоий тармоқларда кенг муҳокамаларга сабаб бўлмоқда. Таъкидлаш керак, мазкур бахтсиз ҳодиса мактабгача таълим ташкилоти ҳудудида эмас, тарбияланувчи истиқомат қиладиган уйнинг орқа тарафида, яшаш хонадонининг боғ қисмидан оқиб ўтган сойда содир бўлган.Тарбияланувчи воқеа содир бўлган куни эрталаб опаси ҳамроҳлигида Ўзбекистон тумани ‘Қум’ маҳалласида жойлашган 23-сонли боғчага келган. Таълим ташкилотида уни тарбиячиси кутиб олган. Бироқ, тарбияланувчи боғчада қолишни хоҳламасдан, инжиқлик қилиб йиғлаган. Укасини кўндира олмаган опаси болани қайтариб олиб кетган. Бола уйига қайтиб бориб, меҳмонга келган холасининг фарзандларига қўшилиб ўйнаётган вақтда оёғи сирпаниб сойга тушиб кетган. Натижада шундай бахтсиз ҳодиса содир бўлган.
Ушбу маълумотларни марҳум тарбияланувчининг яқинлари, хусусан уни боғчага олиб борган ва у ердан қайтариб олиб кетган опаси ҳам тасдиқлаган. Мазкур бахтсиз ҳодисадан сўнг бошқарма бошлиғининг топшириғи билан вилоятдаги барча шаҳар ва туманлардаги мактабгача таълим ташкилотларида эҳтиёт чораларини кучайтириш, тарбияланувчи ўғил-қизларни вояга етган шахслар — ота-онаси ёки уларнинг ўрнини босувчи бошқа яқинларидан қабул қилиб олиш ва кун якунида уларга топшириш бўйича тарғибот-ташвиқот ишлари олиб борилди», — дейди вилоят мактабгача таълим бошқармаси ахборот хизмати раҳбари Файзулло Султонов.
Бош прокуратура матбуот котиби Ҳаёт Шамсутдиновнинг маълум қилишича, 23-сонли давлат мактабгача таълим ташкилотининг молиявий фаолияти ўрганилганда, тарбияланувчилар учун сарфланиши лозим бўлган 24,3 миллион сўмлик озиқ-овқат маҳсулотлари талон-торож қилингани аниқланган. Ҳолат юзасидан Жиноят кодексининг 167-моддаси 2-қисми «г» банди (ўзлаштириш ёки растрата йўли билан талон-торож қилиш) билан жиноят иши қўзғатилган.
Фарғона вилояти мактабгача таълим бошқармаси раҳбари Юлдузхон Хўжаеванинг таъкидлашича, ҳозирда мактабгача таълим ташкилотида озиқ-овқат маҳсулотлари талон-торож қилингани юзасидан аниқ маълумот мавжуд эмас. Ушбу ҳолатга аниқлик киритиш учун ҳуқуқни муҳофаза қилиш идоралари вакиллари ҳамда мутахассислар иштирокида ўрганиш ишлари олиб борилади. Шундан сўнг, ҳолат юзасидан батафсил маълумот берилади.
«Дарё» воқеалар ривожини кузатиб боради.
Изоҳ (0)