Қозоғистон Мажилиси (парламент қуйи палатаси) депутатлари Биринчи президент кунини давлат байрамлари тоифасидан чиқариб ташлашни таклиф қилди. Бу ҳақда ижтимоий-маданий ривожланиш қўмитаси раиси Жамила Нурманбетова имзолаган хулосага таяниб, «Власт.кз» хабар бермоқда.
Бундай таклиф «Кинематография ва маданият масалалари бўйича айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳасига киритилган. Қонун лойиҳаси 7 сентябрь, чоршанба куни ялпи мажлисда кўриб чиқилади.
«1 декабрь – Биринчи президент кунини Давлат рамзлари куни, Шукроналик куни ва бошқа ижтимоий аҳамиятга эга бўлган байрамлар рўйхатидан чиқариб ташлаган ҳолда нишонлаш таклиф этилмоқда», — дейилади хабарда.
Қозоғистон биринчи президенти куни 1 декабрда нишонланади ва у дам олиш куни ҳисобланади. Байрам давлат раҳбари Нурсултон Назарбоев шарафига ташкил этилган. Ушбу байрамга давлат байрами мақомини бериш тўғрисидаги қонун 2011 йил 14 декабрда имзоланган.
Сентябрь ойи бошида «Жана Қазақстан» депутатлар гуруҳи пойтахт Нур-Султон шаҳри номини аввалги Остонага қайтаришни таклиф қилганди. Қозоғистон пойтахти номи 2019 йилнинг март ойида мамлакатнинг биринчи президенти Нурсултон Назарбоев шарафига Остонадан Нур-Султонга ўзгартирилган. Бу ҳақдаги фармонни Қосим-Жўмарт Тўқаев имзолаган ва таклифни илгари сурган. Шу билан бирга, шаҳар аҳолиси уни Остона деб аташда давом этган.
Изоҳ (0)