Путин Украина билан тузилган «дон битими»ни чеклашни Эрдўғон билан муҳокама қилади

Бугунги кунда «дон битими» доирасида Украинадан олиб чиқиб кетилган маҳсулотларнинг атиги 3 фоизи энг камбағал мамлакатларга йўналтирилган. Шу муносабат билан донни чиқариб кетиш йўналишларини чеклаш зарур, деди Россия президенти Владимир Путин Шарқий иқтисодий форум (ШИФ)нинг ялпи сессиясидаги нутқида.

Унинг сўзларига кўра, эҳтиёжманд мамлакатларни қўллаб-қувватлаш учун тузилган «дон битими» доирасида кемаларнинг катта қисми Евроиттифоқ мамлакатларига йўналтирилган. «Муҳтож мамлакатларга ёрдам беришни кўзда тутувчи БМТ Жаҳон озиқ-овқат дастури бўйича 87 та кеманинг бор-йўғи иккитасига юк ортилди. Уларда 2 миллион тонна озиқ-овқатнинг 60 минг тоннаси, яъни атиги 3 фоизи олиб кетилди», — деди президент.

Путин қайд этишича, Европа мамлакатларининг хатти-ҳаракатлари мустамлакачиларнинг ҳаракатларига ўхшайди, ривожланаётган мамлакатлар эса «шунчаки яна бир марта алданган». «Бундай ёндашув бўладиган бўлса, дунёда озиқ-овқат муаммолари кўлами фақат ўсиб боради… Балки, дон ва бошқа озиқ-овқатни чиқариб кетиш йўналишларини чеклаш ҳақида ўйлаб кўриш керакдир. Мен бу борада Туркия президенти билан албатта маслаҳатлашиб кўраман», — дея таъкидлади Россия раҳбари.

«Дон битими» Россия ва Украина томонидан алоҳида-алоҳида Туркия ва БМТ билан 22 июлда имзоланган эди. Томонлар дон ортилган кемалар Қора денгиз орқали ўтиши учун хавфсиз йўлак яратиш мажбуриятини олди, БМТ, Туркия ва Украина вакиллари ҳарбий юклар ортилишини истисно қилиш учун назорат олиб боришга келишиб олди. Битим узайтириш имконияти билан уч ойга тузилди. Биринчи юк кемаси Одесса портидан 1 август куни чиқиб кетди.

24 февраль куни Россия операцияси бошланганидан кейин Украина портларидан дон ортилган кемалар чиқолмай қолган эди. Киев ва Ғарб мамлакатлари бунда Москвани айблади ва озиқ-овқат инқирози ҳақида огоҳлантирди. Россия, ўз навбатида, портлар украиналик ҳарбийлар томонидан миналаштирилгани туфайли озиқ-овқат чиқиб кетолмаётганини даъво қилди. Охир-оқибат, у ерда, турли ҳисоб-китобларга кўра, 4,5 миллиондан 20 миллион тоннагача буғдой ва маккажўхори тўпланиб қолди.