Qozog‘iston Majilisi (parlament quyi palatasi) deputatlari Birinchi prezident kunini davlat bayramlari toifasidan chiqarib tashlashni taklif qildi. Bu haqda ijtimoiy-madaniy rivojlanish qo‘mitasi raisi Jamila Nurmanbetova imzolagan xulosaga tayanib, “Vlast.kz” xabar bermoqda.
Bunday taklif “Kinematografiya va madaniyat masalalari bo‘yicha ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasiga kiritilgan. Qonun loyihasi 7-sentabr, chorshanba kuni yalpi majlisda ko‘rib chiqiladi.
“1-dekabr – Birinchi prezident kunini Davlat ramzlari kuni, Shukronalik kuni va boshqa ijtimoiy ahamiyatga ega bo‘lgan bayramlar ro‘yxatidan chiqarib tashlagan holda nishonlash taklif etilmoqda”, — deyiladi xabarda.
Qozog‘iston birinchi prezidenti kuni 1-dekabrda nishonlanadi va u dam olish kuni hisoblanadi. Bayram davlat rahbari Nursulton Nazarboyev sharafiga tashkil etilgan. Ushbu bayramga davlat bayrami maqomini berish to‘g‘risidagi qonun 2011-yil 14-dekabrda imzolangan.
Sentabr oyi boshida “Jana Qazaqstan” deputatlar guruhi poytaxt Nur-Sulton shahri nomini avvalgi Ostonaga qaytarishni taklif qilgandi. Qozog‘iston poytaxti nomi 2019-yilning mart oyida mamlakatning birinchi prezidenti Nursulton Nazarboyev sharafiga Ostonadan Nur-Sultonga o‘zgartirilgan. Bu haqdagi farmonni Qosim-Jo‘mart To‘qayev imzolagan va taklifni ilgari surgan. Shu bilan birga, shahar aholisi uni Ostona deb atashda davom etgan.
Izoh (0)