«Қадримга ачиндим». Дилноза Кубаева бюджети 1,5 млрд сўм бўлган «Барон-2» фильмидан 321 минг сўм гонорар олгани ҳақида

Ўзбекистон Миллий кинематографияни ривожлантириш марказининг Telegram-каналида таниқли актриса Дилноза Кубаева билан жонли мулоқот ташкил этилди. Актриса журналистлар ва мухлисларни қизиқтирган кўплаб саволларга жавоб берди.

Дилноза Кубаева қўшиқ айтишининг асосий сабаби ва нега сериалларда суратга тушишни истамаслиги ҳақидаги саволга қуйидагича жавоб берди:

— Ҳақиқатан, фильмлар анча кам суратга олиняпти. Режиссёрлар ҳам ёппасига сериал суратга олишга ўтиб кетишди. Аммо қўшиқ айтиш болаликдаги орзуларимдан бири эди. Айни кунларда 3 та клипим монтаж жараёнида. Яқин кунларда ҳамммасини мухлисларга тақдим этмоқчимиз. Яхши, профессионал ижодкорлар билан ҳамкорлик қилишни ёқтираман. Султонали Раҳматов билан 6 та қўшиқ ёздик.Сериалларда рол ижро этмаслигимнинг асосий сабаби уларнинг бирортасида ўзимни кўрмаётганимда бўлса керак. Шунингдек, аксариятида сценарий ёки ижодий гуруҳ қониқтирмайди. Айримлар ўйлагандек мен фақат пул учун ролларни рад этаётганим йўқ.

Дилноза Кубаева бюджети 1,5 миллиард сўм бўлган «Барон-2. Соғинч» фильмидан олган гонорари кўнглини хира қилгани ҳақида сўзлаб берди.

— Мен ҳаммасини ичимга ютадиган, оғир-вазмин аёлман, балки шу сабабдир «Барон-2. Соғинч»да олган гонорарим ҳақида айтгим келмаяпти. У ерда жуда хунук бир ҳолат бўлди. Бироз келишмовчилик ҳам бўлган, тўғрисини айтсам, озгина қадримга ачиндим. Бу ҳақда биринчи маротаба айтяпман. Лекин барибир муроса қиладиган халқмиз-да. Ўзбеклигимга бориб андиша қилиб, жим кетдим. Лекин юрагимдаги оғриқ ҳали ҳам кетмаяпти. Қорнимга эмас, қадримга йиғлаяпман деган гап бор. Кўп нарсалар Ўзбекистон кинематографияни ривожлантириш агентлиги раҳбариятига маълум бўлмайди. Аммо бу томонлама ҳақ-ҳуқуқларимиз ҳам поймол бўляпти.Рустам ака Саъдиев менинг устозим ҳисобланади. «Фильмда сиз рол ижро этган саҳналар жуда ҳам кам» каби важлар билан 321 минг сўмдан ошиқроқ гонорар олдим. Шу нарса мени бир ойдан буён ичимни ейди. Наҳотки?! Шунда ҳам бизлар кинони яхши кўрамиз, барибир кино деймиз. Аммо уялдим, қадримга ачиндим. Энг катта олган гонорарим хусусий фильмда бўлган бўлса керак. Лекин бюджетга олинадиган кинолардан ҳеч қачон юқори гонорар олмаганман, — дейди актриса Дилноза Кубаева.

Жонли мулоқотни ташкил этган журналист Шоҳида Ҳамро эса фильм катта бюджет эвазига суратга олингани ва бу бўйича Ўзбекистон кинематографияни ривожлантириш агентлиги текширув ишларини олиб бориши ҳақида айтиб ўтди.

Актриса  шахсий ҳаёт ҳақидаги саволларига қисқа ва лўнда  жавоб берди.

— Ўғлим Муҳаммадамин 14 ёшда. Иккимиз бирга яшаймиз. У Глиер номидаги мусиқа мактабида ўқийди. Замонавий техникаларга жуда қизиқади, — деди актриса.

Бундан ташқари, Дилноза Кубаева кун сайин вайнерлар фаолиятига санъат даражасида қаралаётгани ва улар профессионал ижодкорлардан кўпроқ ҳақ олишлари ҳақидаги саволга қуйидагича жавоб берди.

— Афсуски, кейинги пайтда ҳақиқатан ҳам шундай бўлиб қолди. Аммо бу ўткинчи ҳолат. Мени вайнерлардан ҳам кўпроқ, уларга эргашиб кетаётган профессионал актёрлар ташвишга соляпти, — дейди актриса.

Кўпчилик актёрлар хориж фильмларида суратга тушишни исташини айтишади. Аммо негадир актриса ҳеч қачон хориж кинолари сари интилмагани ва буни истамаслигини қуйидагича изоҳлади.

— Менга хорижлик ижодкорлардан жуда кам таклифлар бўлган. Охирги марта қачон ролга таклиф этилиб, кастингда иштирок этганимни ҳам эслолмайман. Чунки менда хоҳиш ва интилиш йўқ. Улар билан ҳамкорлик қилгандан кейин, албатта, уларнинг талаблари бўлади. У фильмларда миллийлигимизга зид бўлган саҳналар ҳам бўлиши мумкин. Шу боис хориж фильмида суратга тушишга интилишим йўқ, — дея жавоб берди Дилноза Кубаева.

Мавзуга доир:

• «Сохта Дилноза Кубаевалар кўпайиб кетди» — Дилноза Кубаева фирибгарлардан безор бўлгани ва тўйларда хонандалик ҳам қилмоқчилиги ҳақида (фото, видео)
• « ‘Осмондаги болалар-3’да суратга тушмоқчиман». Дилноза Кубаева актрисаликни тарк этиб, хонандалик қилмоқчилиги ҳақидаги миш-мишларга изоҳ берди (видео)
• «Аёлим Дилноза Кубаевага ўхшасин, аммо актриса бўлмасин». Ёш актёр Темур Кубаев машҳур опанинг укаси бўлиш масъулияти ҳақида
• Рустам Саъдиев «Барон-2»да нима сабабдан Улуғбек Қодиров рол ўйнамагани, суратга олишда қайси масалаларда қийналгани ва фильмдаги кесилган саҳналар ҳақида (видео)