Аслида фарзандларнинг ота-онасига ўхшаши табиий ҳол. Аммо баъзан улар сувнинг икки томчиси каби бир-бирларига ўхшашади. Машҳур ўзбек санъаткорлари орасида ҳам фарзанди ўзига қуйиб-қўйгандек ўхшашлари бисёр. Қуйида улар ҳақидаги маълумотлар билан танишамиз.
Рахшона Маҳмудова: «Онам мендан анча чиройлироқ»
Актриса Раъно Шодиеванинг ёлғиз қизи Рахшона ташқи кўриниш жиҳатидан онасига жуда ўхшайди. Айни кунларда у она бўлиш арафасида.
— Ҳақиқатан ҳам кўпчилик онамга ўхшатади. Аммо мен бундай ҳисобламайман. Онам мендан кўра анча чиройлироқ. Актрисаликка аввалдан унча қизиқишим бўлмаган, тил ўрганишни истаганман. Ҳозирча тўртта тилни биламан. Рус, инглиз, корейс ва сурдо тилларида бемалол мулоқот қилоламан.Онамнинг актриса эканлигини 3 ёшимда билганман. Чунки съёмка бўлса иккинчи онам — Муниса келинойимнинг уйига ташлаб кетишарди. Онамни соғиниб инжиқлик қилганимда эса телевизорни ёқиб беришарди.Ҳозирча режиссёрлар онам билан ўхшашлигимиз учун бирор жиддий таклифлар беришмади. Фақатгина Аюб Шаҳобиддинов «Ўтов» фильмида ташқи кўринишимизнинг ўхшашлигидан фойдаланиб, она-бола қилиб кўрсатган, — дейди Рахшона Маҳмудова.
Санжар Холиқов: «Дадамга тақлид қилмайман»
Ўзбекистонда хизмат кўрсатган артист Рашид Холиқовнинг тўрт нафар фарзанди бор. Учта ўғиллари орасида тўнғич ўғли Санжар Холиқов кўпроқ унга ўхшайди.
— Кўпчилик ташқи кўринишим ва овозимни дадамга ўхшатишади. Менимча, бу ўхшашлик табиий. Айримлар ўйлаганидек, овоз ва услуб жиҳатидан ҳам дадамга тақлид қилмайман. Шунчаки, эсимни таниганимдан буён шу услубда кийиниш тўғри деб ҳисоблаганман. Яъни инсондаги дид ҳам оиладаги муҳит таъсирида шаклланади, демоқчиман. Дадам билан яна бир ўхшаш жиҳатимиз бор. Яъни мен ҳам дадамдек қиммат клип олишни истайдиган хонандалардан бириман, — дейди Санжар Холиқов.
Ота-болани ака-укага ўхшатишади
Сухандон ва актёр Рихситилла Абдуллаевнинг бир ўғил ва икки қиз фарзандлари бор. Ижтимоий тармоқ кузатувчилари ўғли Тожираҳмонни отасига жуда ўхшаши ҳақида кўп ёзишади. Ҳатто уларни ака-укага ўхшатганлар ҳам кўп.
Тожираҳмон тил ўрганиш билан бирга санъатга ҳам қизиқади. У Ўзбек Миллий академик драма театрида намойиш этилган спектаклларнинг бир нечтасида массовка ролларни ҳам ижро этган.
— Санъатга бўлган қизиқишим 3-4 синфларда ўқиётганимда пайдо бўлган. Дадамга буни айтсам «Нима қиласан, бу жуда қийин касб», деб ниятимдан қайтармоқчи ҳам бўлган. Аммо барибир қизиқишим устунлик қилди. Мен жуда бахтли инсонман. Чунки уйимда устозим бор. Дадам кўп китоб ўқишимни, нутқ устида ишлашимни ва либосларимга алоҳида эътибор беришимни истайди, — дейди Тожираҳмон Абдуллаев.
Шаҳзод Султонов: «Аввал дадамнинг санъаткор эканлигини яширардим»
Ёш актёр Шаҳзод Султонов «Зилола» қўшиғи билан танилган хонанда Ойбек Султоновнинг фарзанди ҳисобланади. Ота-бола ташқи кўриниши жиҳатидан бир-бирига ўхшаса-да, феъл-атворлари ўхшаш эмас.
— Оилада икки ўғилмиз. Мен кенжа фарзандман. Акамга нисбатан кўпроқ мени дадамга ўхшатишади. Илк санъатга кириб келган пайтларим дадамнинг санъаткор эканлигини яширардим. Аммо баъзилар «Хонанда Ойбек Султоновга роса ўхшар экансиз», дейишарди. Мен эса негадир оиламизда санъаткорлар йўқ дердим. Дадам билан ўхшаш жиҳатларимиз бор, аммо у қадар кўп эмас, — дейди актёр Шаҳзод Султонов.
Ислом Фармонов: «3 ёшимда қўшиқ айтишни ўрганганман»
Ўзбекистонда хизмат кўрсатган артист Илҳом Фармоновнинг кейинги патларда асосан тўнғич ўғли Ислом билан тўй хизматларида иштирок этмоқда. Ота-бола овоз ва ташқи кўриниш жиҳатидан бир-бирига жуда ўхшаш. Ота-боланинг рэпертуари деярли битта бўлгани учун Илҳом Фармоновни хизматга чақиролмаганлар Исломни тўйларига айтишлари мумкин.
— Санъатга болалигимдан қизиққанман. Уч ёшимда бошлаб «Томоша» гуруҳига бориб, қўшиқлар ўрганганман. Санъаткор бўлишимда нафақат отамнинг, балки бобом раҳматлининг ҳам ҳиссаси катта. Ташқи кўринишимиз жуда ўхшаш, айримлар овозимизни ҳам ўхшатишади. Аммо отамга атайин тақлид қилмайман, — дейди хонанда Ислом Фармонов.
Мавзуга доир:
- Юлдузларнинг ўзига икки томчи сувдек ўхшайдиган фарзандлари (фото)
- Дилноза Кубаеванинг укаси, Севара Назархоннинг холаваччаси: қариндош эканини кўпчилик билмайдиган ўзбек санъаткорлари (фото)
- Зарина Низомиддинованинг холаваччаси, Даврон Кабуловнинг божаси: Қариндош эканини кўпчилик билмайдиган ўзбек шоу-бизнеси вакиллари (фото)
Изоҳ (0)