Хонанда Ёрқинхўжа Умаров «Халқлар дўстлиги» санъат саройида жонли ижродаги концерт дастурини тақдим этди. «Дарё» мухбирлари концертнинг сўнгги кунига ташриф буюриб, саҳна ва унинг ортидаги қизиқарли воқеалар ҳақида репортаж тайёрлади.
Ёдингизда бўлса, хонанда илк концертини 2019 йили «Халқлар дўстлиги» санъат саройида ўтказганди. Унинг илк концертида ҳам тўлиқ жонли ижрода қўшиқ куйлагани кўплаб эътирофларга сазовар бўлганди.
2019 йилдаги дастурдан аввал хонанданинг овози бўғилиб қолгани ва бир неча соат қолганида ҳам маъмурлар концертни қолдириш ҳақида ўйлашгани ҳақидаги гаплар тарқалганди. Хонанда бу гапларни тасдиқлаб, таваккал қилгани ва мухлисларнинг олқиши сабаб хасталикни енгиб ўтгани ҳақида сўзлаб берганди.
Хайриятки, бу сафар бунга ўхшаш кўнгилсиз воқеа бўлмади. Фақат концертнинг илк куни овоз кучайтиргич мосламалари кўнгилдагидек ишламагани ҳақида хонанданинг онаси Зоҳида Умарова сўзлаб берди.
Уч блокдан иборат дастурда хонанда 22 та қўшиқни жонли ижрода куйлади.
Концерт режиссёри, хонандани кашф этган «The сover up» лойиҳасининг бошловчиси, актёр Алишер Узоқов бўлди.
Хонанданинг илк концертида қизиқчи Шукурулло Исроилов иштирок этганди. Ёрқинхўжа Умаров бу сафар ҳам уни меҳмон санъаткор сифатида саҳнага чиқишини истади.
Хонанда ажойиб кўриниш ва жарангли овоз соҳибалари бўлган «Allianas» гуруҳи билан дуэт куйлади.
Уларнинг дуэти инглиз тилида куйланди.
Дастур давомида Ёрқинхўжа Умаровнинг мухлислари ҳам ўзидек қувноқ эканликларини исботлашди. Улар қўшиқларни шунчаки тингламай, хонандага жўр бўлишди.
Ёрқинхўжа Умаров «Юрт қадри» қўшиғи билан халқимизга яхши таниш бўлган Зоҳида Умарованинг ўғли эканини кўпчилик билади. Концерт аввалида ўғли билан қўшиқ куйлашдан қўрқиши ҳақида «Дарё»га маълум қилган собиқ хонанда саҳнада ўғли билан қўшиқ ижро этди.
— Уч кундан бери концертга келаман. Агар ўғлим 20 кун концерт берса, шунча кун келишга ҳам оғринмайман. Менга залнинг қайси ўриндиғида ўтириш аҳамиятсиз. Мен ҳар куни ўғлимни кўраман, буни интиқлик билан кутган мухлислар қанча. Шу боис, чеккага ўтиб, мухлислар мазза қилиб концерт кўришларини истадим. Ўғлим бутун овоз соҳиби, уни ҳурмат қилиб келган мухлислардан миннатдорман, — дейди Зоҳида Умарова.
Зоҳида Умарова ўғли билан дуэт куйлаётиб, негадир унинг устидан сув қуйди. Бу ҳол кўпчиликни ажаблантирди.
Шукурулло Исроилов хонанданинг кўплаб мухлисларини саҳнага таклиф этиб, уларга микрофон тутди. Баъзи мухлисларнинг ижроси томошабинларга ёқди, айримлари эса қўшиқчи бўлиш ҳам осон эмаслигини тушунишди.
Концертнинг учинчи куни «Аристократлар» жамоаси вакиллари гуллар ўрнига бир неча қути пицца билан ташриф буюрди. «Топган гул, топмаган ўзи пиширган пицца» дейишгандирда...
Мухлислари томонидан берилган ажойиб туҳфа — зарбоп тўн ва дўппи бўлди.
Концерт рақсларга бой бўлди. Хонанда раққос йигитлар билан бирдек рақсга тушиб, томошабинларга ўзгача кайфият улашди.
Одатда саҳна ортида концерт режиссёрларининг асабийлашиши, ижодий жамоа билан тортишиши ёки уларга дакки бераётганини кўришга одатланиб қолгандик. Ёрқинхўжа Умаровнинг концерт режиссёри эса анча хотиржам. Алишер Узоқов дастурни залдан туриб томоша қилди.
Концерт ярмида «Браво» жамоасининг аъзоси Шаҳло Зоирова ҳам келди. У саҳнада мароқ билан рақсга тушди.
Хуллас, концерт аъло даражада ўтди. Агар унинг завқини тўлиқ ҳис қилмоқчи бўлсангиз «Дарё»нинг YouTube’даги расмий канали орқали томоша қилишингиз мумкин.
Мавзуга доир:
- Зални «жонлантирган» Севинч Мўминова, саломатлиги оғирлашган хонанда ва саҳнага чақирилмаган Муҳаббат Қурбонова — Воҳиджон Исоқовнинг илк концертидан репортаж (фото ва видео)
- Мусиқий билимга эга бўлмаган, клиплари ҳеч қачон телеканалларда кўрсатилмаган юлдуз. Жалолиддин Аҳмадалиевнинг илк яккахон концертидан репортаж (фото, видео)
- «Қизил олма»дан «Санамгина»гача: Юлдуз Усмонованинг «80—90 йил хитлари» концерт дастуридан репортаж (фото ва видео)
- Аҳад Қаюмнинг ўхшамаган пиари, саҳнани эгаллаган вайнчилар. Ҳамдам Собировнинг илк яккахон концертидан репортаж (видео)
- Саҳнани қўриқлаётган Ҳалима ва Мансур Агалиевнинг кўз ёшлари. Юлдуз Усмонованинг концертидан репортаж (видео)
Изоҳ (0)