Россия назоратидаги Мариупол манзаралари, Донбассда ёнғинлар. Урушнинг 194-кунидан фоторепортаж
5 сентябрь куни Владимир Путин «Россиянинг хориждаги гуманитар сиёсати» концепциясини тасдиқлади. Унинг вазифаларидан бири «рус дунёси» анъаналари ва идеалларини ҳимоя қилишдир. Айни пайтда, «Ягона Россия» сиёсий партияси ишғол остидаги Мариуполда гуманитар ёрдам тарқатмоқда, Санкт-Петербург ҳокимияти эса Мариуполда Александр Невскийга ҳайкал ўрнатмоқчи. Владимир Зеленский Украина жануби ва шарқидаги учта аҳоли пункти озод этилганини эълон қилди. У айнан қайси ҳудудлар эканига аниқлик киритмади, бироқ Украина бир неча йўналишда қарши ҳужум олиб бораётганига шама қилди. Запорожье АЭСда станцияни Украина энергетика тизими билан боғловчи сўнгги электр узатиш тармоғи ўчирилди (бу ҳақда Украинанинг «Энергоатом» агентлиги хабар берган). Meduza урушнинг 194-кунига оид асосий суратларни эълон қилди.
Мариупол
Қуйида Россия назоратидаги Мариуполдан август ойи охирида олинган суратлар. Бу уруш пайтида олинган ноёб кадрлар бўлиб, улар ёрдамида шаҳарнинг ҳозирги ҳолатини баҳолаш мумкин. Афтидан, Мариуполда фотосуратчилар деярли йўқ, у ерда мустақил матбуот фаолиятига рухсат берилганми ёки йўқми номаълум.
25 август куни Санкт-Петербургдаги «Победа» фонди яқин ойларда Мариуполда 29 та объектни, жумладан, учта боғча, учта мактаб, иккита клиника, онкология биноси, болалар жарроҳлиги биноси ва турар жой биноларини тиклаш режалаштирилаётганини маълум қилди. Бундан ташқари, шаҳарда Александр Невскийнинг бадиий ҳайкали ўрнатилади.
«Ягона Россия» партиясига қарашли марказ Мариуполда озиқ-овқат ва гуманитар ёрдам тарқатмоқда.Фото: Anadolu
Ёнида З белгиси бор бузилган ҳарбий техника.Фото: Anadolu
Мариуполдаги вайрон бўлган кўчалардан бири. Август ойида шаҳарга келган россиялик қурувчилар Россия Қурилиш вазирлиги томонидан тасдиқланган режага мувофиқ шикастланган уйларни бузишни бошлади.Фото: Anadolu
Оккупация қилинган шаҳар аҳолиси. 11 август куни шаҳар мери Вадим Бойченко Россия Мариупол аҳолисини Украинага қарши урушга сафарбар қилаётганини айтди. Мернинг сўзларига кўра, Мариуполда фильтрлаш лагерлари ҳамон ишламоқда, рус ҳарбийлари эса одамларни шаҳардан чиқармаяпти.Фото: Anadolu
Шаҳар кўчаларидан бирида август ойи охирида олинган сурат. Март ойи ўрталарида ўққа тутилиб вайрон бўлган Драма театри биноси атрофида энди девор қуриш бошланган – шаҳар мери маслаҳатчиси Пётр Андрюшченко буни исботловчи видеони эълон қилди. Унинг фикрича, Россия оккупацион ҳокимияти «бинони тўлиқ дезинфекция қилиш ва ўз жиноят изларини абадий яшириш» мақсадида шундай қилмоқда.Фото: Anadolu
Вайрон бўлган бинолардан бири «снос» қилинмоқда.Фото: Anadolu
Донбасс шимоли
Донецк вилояти, Енакиево шаҳридаги Петербург трамвайлари. Ленинград вилояти Енакиевога Шаҳар куни муносабати билан олтита трамвай совға қилди, дея хабар бермоқда маҳаллий ОАВ. Аввалроқ Путиннинг қарорига мувофиқ Россия ҳудудлари ДХР ва ЛХРнинг босиб олинган ҳудудларига «ҳомийлик» учун бириктирилган эди.Фото: «ТАСС»
Украиналик ўт ўчирувчилар турар жой биносида рус қўшинларининг зарбасидан кейинги ёнғинни ўчирмоқда. 6 сентябрга ўтар кечаси россияликлар Баҳмут ва Константиновкадаги фуқаролик объектларини ўққа тутди, деб хабар беради Украина Қуролли кучлари Бош штаби.Фото: Reuters
Ёнғин ўчирилаётган пайтда кўчада турган баҳмутликлар.Фото: Reuters
Северскдаги касалхона ҳудудида янги қабрлар. Бу ерда Россия ҳужумлари, ўққа тутиш ва авиазарбалар давом этмоқда.Фото: Instagram
Северскда вайроналар орасида ётган ўйинчоқ. Сурат муаллифининг айтишича, шаҳарда бирорта бутун бино қолмаган.Фото: Instagram
Северскда яшовчи киши. Август ойи охирида Британия разведкаси россияликларнинг Донбассдаги ҳужумлари кучайиши мумкинлигидан огоҳлантирди. Донецкдан шимолда айнан Северск ва Баҳмут ҳудудида интенсив жанглар давом этмоқда.Фото: Instagram
Славянскда портлашдан ҳосил бўлган ўра. Қизил Хочнинг Украина бўлими жойлашган бино яқинига снаряд тушган. Украина шаҳарни ўз назоратида сақлаб қолмоқда.Фото: AP Photo
Тезкор ҳаракатланиш отряди бошлиғи Тарас Логинов Россиянинг Славянскка навбатдаги зарбасидан кейин Қизил Хочнинг Украина бўлими жойлашган бино ичини кўздан кечирмоқда.Фото: AP Photo
Изоҳ (0)