Aslida farzandlarning ota-onasiga o‘xshashi tabiiy hol. Ammo ba’zan ular suvning ikki tomchisi kabi bir-birlariga o‘xshashadi. Mashhur o‘zbek san’atkorlari orasida ham farzandi o‘ziga quyib-qo‘ygandek o‘xshashlari bisyor. Quyida ular haqidagi ma’lumotlar bilan tanishamiz.
Raxshona Mahmudova: “Onam mendan ancha chiroyliroq”
Aktrisa Ra’no Shodiyevaning yolg‘iz qizi Raxshona tashqi ko‘rinish jihatidan onasiga juda o‘xshaydi. Ayni kunlarda u ona bo‘lish arafasida.
— Haqiqatan ham ko‘pchilik onamga o‘xshatadi. Ammo men bunday hisoblamayman. Onam mendan ko‘ra ancha chiroyliroq. Aktrisalikka avvaldan uncha qiziqishim bo‘lmagan, til o‘rganishni istaganman. Hozircha to‘rtta tilni bilaman. Rus, ingliz, koreys va surdo tillarida bemalol muloqot qilolaman.Onamning aktrisa ekanligini 3 yoshimda bilganman. Chunki syomka bo‘lsa ikkinchi onam — Munisa kelinoyimning uyiga tashlab ketishardi. Onamni sog‘inib injiqlik qilganimda esa televizorni yoqib berishardi.Hozircha rejissorlar onam bilan o‘xshashligimiz uchun biror jiddiy takliflar berishmadi. Faqatgina Ayub Shahobiddinov “O‘tov” filmida tashqi ko‘rinishimizning o‘xshashligidan foydalanib, ona-bola qilib ko‘rsatgan, — deydi Raxshona Mahmudova.
Sanjar Xoliqov: “Dadamga taqlid qilmayman”
O‘zbekistonda xizmat ko‘rsatgan artist Rashid Xoliqovning to‘rt nafar farzandi bor. Uchta o‘g‘illari orasida to‘ng‘ich o‘g‘li Sanjar Xoliqov ko‘proq unga o‘xshaydi.
— Ko‘pchilik tashqi ko‘rinishim va ovozimni dadamga o‘xshatishadi. Menimcha, bu o‘xshashlik tabiiy. Ayrimlar o‘ylaganidek, ovoz va uslub jihatidan ham dadamga taqlid qilmayman. Shunchaki, esimni taniganimdan buyon shu uslubda kiyinish to‘g‘ri deb hisoblaganman. Ya’ni insondagi did ham oiladagi muhit ta’sirida shakllanadi, demoqchiman. Dadam bilan yana bir o‘xshash jihatimiz bor. Ya’ni men ham dadamdek qimmat klip olishni istaydigan xonandalardan biriman, — deydi Sanjar Xoliqov.
Ota-bolani aka-ukaga o‘xshatishadi
Suxandon va aktyor Rixsitilla Abdullayevning bir o‘g‘il va ikki qiz farzandlari bor. Ijtimoiy tarmoq kuzatuvchilari o‘g‘li Tojirahmonni otasiga juda o‘xshashi haqida ko‘p yozishadi. Hatto ularni aka-ukaga o‘xshatganlar ham ko‘p.
Tojirahmon til o‘rganish bilan birga san’atga ham qiziqadi. U O‘zbek Milliy akademik drama teatrida namoyish etilgan spektakllarning bir nechtasida massovka rollarni ham ijro etgan.
— San’atga bo‘lgan qiziqishim 3-4 sinflarda o‘qiyotganimda paydo bo‘lgan. Dadamga buni aytsam “Nima qilasan, bu juda qiyin kasb”, deb niyatimdan qaytarmoqchi ham bo‘lgan. Ammo baribir qiziqishim ustunlik qildi. Men juda baxtli insonman. Chunki uyimda ustozim bor. Dadam ko‘p kitob o‘qishimni, nutq ustida ishlashimni va liboslarimga alohida e’tibor berishimni istaydi, — deydi Tojirahmon Abdullayev.
Shahzod Sultonov: “Avval dadamning san’atkor ekanligini yashirardim”
Yosh aktyor Shahzod Sultonov “Zilola” qo‘shig‘i bilan tanilgan xonanda Oybek Sultonovning farzandi hisoblanadi. Ota-bola tashqi ko‘rinishi jihatidan bir-biriga o‘xshasa-da, fe’l-atvorlari o‘xshash emas.
— Oilada ikki o‘g‘ilmiz. Men kenja farzandman. Akamga nisbatan ko‘proq meni dadamga o‘xshatishadi. Ilk san’atga kirib kelgan paytlarim dadamning san’atkor ekanligini yashirardim. Ammo ba’zilar “Xonanda Oybek Sultonovga rosa o‘xshar ekansiz”, deyishardi. Men esa negadir oilamizda san’atkorlar yo‘q derdim. Dadam bilan o‘xshash jihatlarimiz bor, ammo u qadar ko‘p emas, — deydi aktyor Shahzod Sultonov.
Islom Farmonov: “3 yoshimda qo‘shiq aytishni o‘rganganman”
O‘zbekistonda xizmat ko‘rsatgan artist Ilhom Farmonovning keyingi patlarda asosan to‘ng‘ich o‘g‘li Islom bilan to‘y xizmatlarida ishtirok etmoqda. Ota-bola ovoz va tashqi ko‘rinish jihatidan bir-biriga juda o‘xshash. Ota-bolaning repertuari deyarli bitta bo‘lgani uchun Ilhom Farmonovni xizmatga chaqirolmaganlar Islomni to‘ylariga aytishlari mumkin.
— San’atga bolaligimdan qiziqqanman. Uch yoshimda boshlab “Tomosha” guruhiga borib, qo‘shiqlar o‘rganganman. San’atkor bo‘lishimda nafaqat otamning, balki bobom rahmatlining ham hissasi katta. Tashqi ko‘rinishimiz juda o‘xshash, ayrimlar ovozimizni ham o‘xshatishadi. Ammo otamga atayin taqlid qilmayman, — deydi xonanda Islom Farmonov.
Mavzuga doir:
- Yulduzlarning o‘ziga ikki tomchi suvdek o‘xshaydigan farzandlari (foto)
- Dilnoza Kubayevaning ukasi, Sevara Nazarxonning xolavachchasi: qarindosh ekanini ko‘pchilik bilmaydigan o‘zbek san’atkorlari (foto)
- Zarina Nizomiddinovaning xolavachchasi, Davron Kabulovning bojasi: Qarindosh ekanini ko‘pchilik bilmaydigan o‘zbek shou-biznesi vakillari (foto)
Izoh (0)