1997 йилда Маҳима Чаудхари Шоҳрух Хон билан «Саробга айланган умидлар» мелодрамасида дебют қилганида, кўпчилик унинг порлоқ келажагини башорат қилган эди, деб ёзади Bollywoodtime.
Фильм муваффақиятга эришди ва Маҳима энг яхши дебют роли учун Filmfare мукофотига сазовор бўлди. Режиссёр Субҳаш Гхай Маҳимани кўриб, ролга тасдиқлашдан олдин 3000 та актрисани тинглаганига ишониш қийин. Бироқ умид берувчи гўзал эртак тезда якун топди ва тез орада у муаммо ҳамда жанжаллар гирдобига тушиб қолди.
Маҳима Чаудхарининг ҳақиқий исми Рита. Аммо уни суратга олган биринчи режиссёр шу қадар ғалати эдики, у фақат исмлари «М» ҳарфи билан бошланадиган актрисаларни ролга тасдиқлашни хоҳлади (Мадхури Дикшит, Минакши Шешадри, Маниша Койрала). У Ританинг исмини Маҳимага ўзгартиришга мажбур қилди ва ўшандан кейин у шу тахаллус билан танилди.
Маҳима 1973 йил 13 сентябрда Ғарбий Бенгалиянинг Даржилинг шаҳрида туғилган. Актриса ўз гўзаллигини непаллик онаси ва ҳинд отасидан мерос қилиб олди. Унинг шунчалар гўзаллигидан, ҳатто ўсмирлик чоғиданоқ реклама агентликлари унга эътибор беришни бошлади. У ўқишни ёқтирмасди, шундандир балки, суратга тушиш учун мактабни хурсандчилик билан тарк этди. Кейинчалик у Бомбейга кўчиб ўтди ва у ерда бошловчи бўлиб ишлади. Айнан ўша ерда Субҳаш Гхай уни кўриб қолди.
«Саробга айланган умидлар» бутун Ҳиндистонни ларзага солиб, 1997 йилнинг энг кўп даромад келтирган Болливуд фильмлари бешлигига кирди ва бир қанча нуфузли мукофотларни қўлга киритди. Бироқ муваффақият актриса ва режиссёр ўртасидаги хунук жанжал соясида қолди. Маҳима Субҳаш Гхайни қўрқитиш ва таъқиб қилишда айблади, шунингдек, кино саноатининг бошқа актёрларидан у билан ишламасликни сўради.
Аслини олганда, Гхай асосий ролларни фақат унга маълум хизматлар кўрсатган актрисаларга бергани билан танилган, аммо Маҳимадан олдин унинг қаҳрамонларидан ҳеч бири бу ҳақда очиқ гапирмаган. Чаудхарининг жасорати кимларнингдир ғашига тегди ва у дарҳол «сурбет юлдуз» деб номланди. Катта режиссёрлар Маҳима блан эҳтиёткорона муносабатда бўлди.
Маҳиманинг навбатдаги лойиҳаси Санжай Датт билан ҳамкорликдаги «Тавба» триллери, ундан кейин эса «Юрак қандай уриши керак?» мелодрамаси бўлди, унда рол ижро этиш Маҳима учун жуда қимматга тушди. Акриса ўша кунни шундай эслайди:
«Мен Ажай Девган ва Кажол билан фильм устида ишлаётган эдим, студияга кетаётганимда бахтсиз ҳодисага учрадим. Юк машинаси менинг машинамга урилди ва шиша юзимни кесиб ташлади. Мен ўлаяпман деб ўйладим. Ўшанда шифохонага боришимга ҳеч ким ёрдам бермади. Ўзимни кўзгуда кўриб, даҳшатга тушдим. Шифокорлар мени операция қилиб, танамдан 67 дона шиша олиб ташлади. Кўп фильмлардан воз кечишга тўғри келди. Мен ҳаммадан яширинган эдим. Ва фақат оилам туфайли омон қолдим».
Аммо бундан кейин ҳам унинг карьерасида ажойиб ва эътиборга молик роллар пайдо бўлди. Масалан, «Юрак уриши», «Қочоқ», «Менга фақат севги керак» каби фильмларда кўриш мумкин.
Маҳиманинг сўзларига кўра, унинг карьерасига таъсир қилган яна бир факт шахсий ҳаёти эди. 2000 йилда у теннисчи Леандер Паес билан учрашди ва уларнинг муносабати жиддий тус олди. Кейинчалик у бу туфайли қимматли йилларини йўқотганини айтиб ўтди. Леандер ўша пайтда актёр Санжай Дуттга турмушга чиққан Рея Пиллай билан ҳам муносабатда бўлганини билгач, унинг орзулари ва умидлари бир зумда пучга чиқди.
Маҳима Рея ундан фарзанд кутаётганини билгач, дарҳол Леандер билан барча муносабатларни узди ва 2006 йилда меъмор ва бизнесмен Бобби Мукержига турмушга чиқди. Уларнинг муносабати 2011 йилгача, эр-хотиннинг ажрашгани ҳақида хабар пайдо бўлгунга қадар сир бўлиб қолди. Уларнинг Ариана исмли қизи бор. У ҳозир 15 ёшда ва у онаси каби гўзал бўлиб улғаймоқда.
Аммо бахтсиз ҳодиса ва хиёнатга бой муносабатлар Маҳима ҳаётида етарли эмасдек туйилди. Яқинда унга кўкрак бези саратони ташхиси қўйилди. «Мен даволандим ва ҳозир жуда яхши ҳолатдаман», — дейди актриса. У охирги марта 2016 йилда «Қора шоколад» фильмида иштирок этган. Аммо тез орада у «Сўнгги имзо» лойиҳаси билан экранларга қайтади.
Изоҳ (0)