Фунт стерлинг долларга нисбатан 1985 йилдан бери энг паст даражага тушди

Долларнинг асосий валюталарга нисбатан курси ўсишни бошлади, евро ва фунт стерлинг эса тушиб бормоқда. Бу ҳақда «Коммерсантъ» хабар бермоқда.

Савдо очилишида валюта 1 фунт стерлинг учун 1,14 долларга тушди. Бу 1985 йилдан бери энг паст кўрсаткичдир.

Бугунги кун ҳисобидан валюта 1 фунт стерлинг учун 1,1443 долларгача тушиб кетди, бу сўнгги 37 йилдаги энг паст кўрсаткич.

Август ойи охирида евро долларга нисбатан 0,7 фоизга пасайиб, сўнгги 20 йиллик энг паст кўрсаткичга етганди.

Ёзнинг охирги ҳафтасида евро курси кўтарила бошлади. Бугун, 5 сентябрь куни Европада ҳам газ нархи кескин кўтарила бошлади – савдолар очилишида унинг нархи 30 фоиздан кўпроққа ошди. «Шимолий оқим»нинг тўлиқ ёпилиши фонида унинг нархи кўтарилди.

Аввалроқ Британия иқтисодиёти тобора ёмонлашаётгани ҳақида хабар берилганди.