Ўзбекистонда контракт учун тўлов солиққа тортиладими?

Ўзбекистонда контракт учун тўлов солиққа тортилмайди. Бу ҳақда Давлат солиқ хизмати хабар берди.

Аҳолининг Ўзбекистон профессионал ва олий таълим ташкилотларига ўзининг, шунингдек 26 ёшга тўлмаган фарзандларининг ёки турмуш ўртоғининг таълим олиши учун йўналтирган иш ҳақи ва бошқа даромадлари солиққа тортилмайди.

Мазкур имтиёз ўқиш учун тижорат банклари томонидан ажратилган таълим кредитларини фоизлари билан қоплаш учун ҳам қўлланилади.

Таълим учун ёки олинган таълим кредитини қоплаш учун маблағларни профессионал ва олий таълим ташкилотларига ёки тижорат банкига иш берувчи томонидан ўтказиб берилиши ва бу маблағларга солиқ солинмаслиги учун ариза билан иш берувчига мурожаат этиш керак.

Бунда, қуйидаги ҳужжатлар илова қилиниши керак:

• талаба билан Ўзбекистон профессионал ёки олий таълим ташкилотлари ўртасида тўлов-контракт асосида ўқитиш тўғрисида тузилган шартнома нусхаси;
• банк билан таълим кредитини олиш учун тузилган шартнома нусхаси.

Агар олдинги йилларда ишлаган, шартнома суммасини мустақил равишда тўлаган шахслар доимий яшаш жойидаги солиқ органига жами йиллик даромади тўғрисидаги декларация ва қуйидаги ҳужжатларни топшириш орқали тўланган даромад солиғини қайтариши мумкин:

• талаба билан Ўзбекистон профессионал ёки олий таълим ташкилотлари ўртасида тўлов-контракт асосида ўқитиш тўғрисида тузилган шартнома нусхаси;
• банк билан таълим кредитини олиш учун тузилган шартнома нусхаси;
• Ўзбекистон профессионал ва олий таълим ташкилотлари ҳисоб рақамига пул маблағларини мустақил тўлаганлигини тасдиқловчи ҳужжатлар нусхаси.

Агар таълим учун йўналтирилган маблағлар миқдори жами йиллик даромаддан ортиқ бўлса, бошқа оила аъзоси (ота/она, эр/хотин) солиқ тўланган сумманинг қолган қисмидан олинган даромад солиғини худди шу тарзда қайтариши мумкин.

Бунда, у аввал имтиёз қўлланилган сумма миқдори тўғрисидаги маълумотнома тақдим этиши керак.

Агар сиз ва сизнинг оила аъзоларингиз турли ҳудудлардаги давлат солиқ органларида рўйхатдан ўтган бўлсангиз, у ҳолда имтиёзни қўлламоқчи бўлган шахс бошқа ҳужжатлар билан бирга оиланинг қолган аъзолари ушбу имтиёзни ҳали қўлламаганлиги тўғрисида маълумотнома тақдим этади.