Britaniya iqtisodiyoti tobora yomonlashmoqda — The Economist
Avgust oyining ilk haftasida Angliya banki yillik inflyatsiya joriy yilning oktabr oyida 13 foizdan sal ko‘proq o‘sishini bashorat qildi. Ushbu o‘sishning kamida yarmi, asosan, Ukrainadagi urush tufayli energiya narxining keskin ko‘tarilishi bilan bog‘liq. The Economist jurnali Britaniya iqtisodiyoti yomonlashayotgani haqida xabar berdi.
Cornwall Insight konsalting kompaniyasining hisob-kitoblari shuni ko‘rsatadiki, Britaniyada uy xo‘jaliklarining o‘rtacha yillik energiya to‘lovlari hozirda 1971 funt sterling (2380 dollar) atrofida. Bu o‘tgan yilga nisbatan sezilarli darajada oshib, aprel oyida 4,427 funt sterlinggacha o‘sishi mumkin.
Xalqaro valyuta fondi tahlillari Britaniyadagi pastki qatlam vakillari narxlar o‘sishidan eng ko‘p aziyat chekishini ma’lum qildi. Kambag‘al aholi boylarga qaraganda o‘z budjetining ko‘proq qismini energiyaga sarflaydi.
Hattoki quyi qatlamni energiya tanqisligidan qanday himoya qilish masalasi Rishi Sunak va Liz Tras o‘rtasidagi Konservativ partiyaning keyingi rahbari bo‘lish uchun kurashda ustuvor bo‘lib turibdi.
Angliya banki 4-avgust kuni foiz stavkalarini yarim foiz punktga oshirdi. Bu 27 yil davomidagi eng katta va ketma-ket oltinchi o‘sishdir.
Bankning prognoz qilishicha, uy xo‘jaliklari turmush darajasining o‘nlab yillardagi eng katta pasayishiga duchor bo‘lishadi.
2023-yilda britaniyaliklar uchun soliqdan keyingi mehnat daromadlari yillik stavkada 4 foizdan ko‘proqqa kamayishi kutilmoqda.
Avvalroq butun dunyo bo‘ylab iqtisodiy o‘sish sekinlashgani haqida xabar berilgan edi.
