Global Peace Index рейтинги бўйича дунё мамлакатларининг хавфлилик даражаси эълон қилинди, деб ёзади Asia Plus.
2022 йилги маълумотларга кўра, рейтингга киритилган 163 та мамлакат ичида Афғонистон охирги ўринни эгаллади. Россия 160-ўринда жойлашди. Россия қуролли кучлари олти ойдан буён махсус ҳарбий операция ўтказаётган Украина эса 153-ўринни банд қилди. Ушбу учта мамлакатнинг барчаси энг хавфли мамлакатлар гуруҳига кирди.
Туркманистон 104, Қозоғистон 97, Тожикистон 92, Қирғизистон 91-ўринда жойлашди. Марказий Осиё мамлакатлари ичида Ўзбекистон энг хавфсизи бўлди — 86-ўрин.
Марказий Осиё мамлакатларининг барчаси Исроил, АҚШ ва Туркия каби давлатлардан хавфсизроқ бўлиб чиқди.
Рейтингнинг энг юқори учта ўрнини Исландия, Янги Зеландия ва Ирландия банд этди.
Global Peace Index рейтинги ҳар йили Тинчлик институти экспертлари халқаро гуруҳининг жамияцҳунослари ва иқтисодиётчилари томонидан Сидней университети Тинчлик ва зиддиятларни ўрганиш маркази билан ҳамкорликда ишлаб чиқилади.
Экспертлар якуний индексни тузиш учун ички ва ташқи зиддиятлар, уларнинг жадаллиги ва қурбонлар сони; қўшни мамлакатлар билан алоқалар; аҳоли орасида қочқинлар улуши; фуқаролар ўртасида ишончсизлик даражаси; сиёсий беқарорлик ва жамоат тартиби; сиёсий террор; терактлар юз бериш тезлиги; ҳар 100 минг кишига қотилликлар сони; маҳбуслар сони; оғир жиноятлар улуши каби кўрсаткичларни ўрганиб чиқади.
Изоҳ (0)