Россиялик ва арманистонлик тадбиркор ва инвестор Рубен Варданян тан олинмаган Тоғли Қорабоғ Республикасига кўчиб ўтганини маълум қилди, деб ёзади Meduza. Ушбу республика ҳудуди ёзиб олинган видеомурожаатда Варданян Россия фуқаролигидан воз кечганини маълум қилди.
«Қандай рискларни ўз зиммамга олаётганимни тушунган ҳолда, Россия фуқаролигидан воз кечиб, Арманистон фуқароси сифатида Арцах (Тоғли Қорабоғнинг арманча номи)га кўчиб ўтишга қарор қилдим. Бу қарорни қабул қилиш мен учун осон бўлмади, аммо тўғри иш тутдим», — деди Варданян.
Варданяннинг сўзларига кўра, сўнгги икки йил ичидаги воқеалар туфайли, Тоғли Қорабоғ аҳолисининг кўпчилигида лоқайдлик ва «ташлаб кетилганлик, ҳеч кимга керак эмаслик туйғуси» пайдо бўлган. «Буни номақбул деб ҳисоблайман. 2020 йилги урушдан кейин биз, бутун дунёдаги арманлар, арцахликлар билан бирга бўлишимиз шарт», — деди тадбиркор.
Рубен Варданян «РБК»га маълум қилишича, Россиядаги активларининг барчасини оилавий фондига ўтказади: «Ҳаммасини шерикларимнинг бошқарувига бериб, оилавий фондга ўтказаман».
Рубен Варданян — «Тройка Диалог» инвестицион компаниясининг собиқ эгаси, «Сколково» бизнес-мактаби асосчиси. 2021 йилда Forbes журнали унинг бойлигини бир миллиард долларга баҳолаган, у Россиянинг 200 нафар энг бой одамлари рўйхатида 116-ўринни эгаллаган эди.
2019 йил мартида OCCRP (Коррупция ва уюшган жиноятчиликни тадқиқ қилиш лойиҳаси — ОАВлар ва мухбирлар бирлашмаси) «Тройка Диалог» офшор компаниялар тизими ҳақидаги суриштирувини эълон қилди, у орқали Россиядаги энг нуфузли одамларга, шу жумладан, Владимир Путиннинг дўсти Сергей Ролдугинга махфий равишда пул ўтказилган. 2006—2013 йилларда ушбу компаниялар ҳисоблари орқали 4,5 миллиард доллардан ортиқ маблағ ўтган. Суриштирув эълон қилинганидан кейин Европарламент депутатлари Рубен Варданянга қарши санкциялар киритишни талаб қилди.
Изоҳ (0)