Польша Германиядан Иккинчи жаҳон урушида етказилган зарар учун 6,2 триллион злотий (тахминан 1,3 триллион доллар) талаб қилади, бу ҳақда «Ҳуқуқ ва адолат» ҳукмрон партияси раҳбари Ярослав Качиньский маълум қилди, деб ёзади «РБК».
«Зарар қиймати сифатида келтирилган сумма — 6 триллион 200 миллиард злотий», — деди Качиньский. Унинг сўзларига кўра, сумма «энг консерватив усул»да ҳисоблаб чиқилган бўлиб, аслида бундан кўп ҳам бўлиши мумкин эди.
Шунингдек, сиёсатчи кўрсатилган сумма Германия иқтисодиёти учун «мутлақо мақбул» экани ва унга «ҳеч қанақасига оғир юк бўлиб тушмаслиги» ҳақида фикр билдирди. Качиньский аниқлик киритишича, сумманинг катта қисмини «5,2 миллион Польша фуқароларининг ҳалокати учун товон пули» ташкил қилади.
Качиньскийнинг сўзларига кўра, репарация (урушда кўрилган зарарни қоплаш учун енгилган ва уруш чиқишига сабаб бўлган давлат томонидан енгган давлатга тўланадиган товон)ни қўлга киритиш йўли узоқ давом этади, аммо Варшава муваффақиятга эришади.
Польша сеймининг репарациялар бўйича махсус комиссияси 2017 йилда Иккинчи жаҳон уруши йилларида Германия томонидан мамлакатга етказилган зарарни 48,8 миллиард долларга баҳолаганди. Бироқ 2018 йил мартида сумма бир неча марта оширилди ва у 850 миллиард долларга етди. 20 кундан кейин Варшава уни 543 миллиард долларгача пасайтирди.
Ўша йили октябрда Польша ҳукумати репарация суммасини «янги технология бўйича» қайта ҳисоблаб чиқишини маълум қилди. Германия ҳукумати Иккинчи жаҳон уруши учун жавобгарликни тан олса-да, улар Польша сеймининг 1953 йилги резолюциясини пеш қилиб, Польшага бир неча марта репарацияларни рад этган. Ўша ҳужжатда Варшава Германия федератив республикаси зарарни қоплаш бўйича барча мажбуриятларини бажарганини маълум қилганди. Бундан ташқари, 1991 йилда Берлин аҳил қўшничилик ҳақидаги битим доирасида яна 1,3 миллиард евро тўлаб берган эди.
Польша мудофаа вазири Мариуш Блашчак 2019 йилда сеймнинг 1953 йилги қарори суверен бўлмаганини айтиб, компенсациялар тўланмаганлигида Россияни айблаганди.
Изоҳ (0)