Самарқанд шаҳрида Шанхай ҳамкорлик ташкилоти давлатларининг навбатдаги саммити ўтказилиши муносабати билан шаҳардаги бир қатор кўчаларда автомобиль ҳаракати чекланади. Бу ҳақдаги қарор Халқ депутатлари Самарқанд шаҳар кенгашининг навбатдан ташқари 69-сессиясида қабул қилинган, дея хабар берди «Дарё» мухбири.
Қарорга мувофиқ 14 сентябрдан 17 сентябрга қадар Самарқанд шаҳридаги Ибн Сино, Бўстонсарой, Университет хиёбони, Намозгоҳ, Садриддин Айний, Регистон, Рудакий, Шоҳизинда, Усто Умар Жўрақулов, Ислом Каримов, Афросиёб, Беруний, Мирзо Улуғбек, Гулобод, Муқимий ва Даҳбед кўчаларида барча транспорт воситаларининг ҳаракати чекланади.
Ҳаракат қатнови чекланган кўчаларда тез тиббий ёрдам ва Фавқулодда вазиятлар вазирлигининг махсус транспорт воситаларига истисно тариқасида ҳаракатланиш учун рухсат берилади. Ҳайдовчиларга ноқулайликлар туғдирмаслик мақсадида айланма йўллар орқали ҳаракатланиш ташкил этилади.
Халқаро аҳамятга эга М-37, М-37А ҳамда М-39 автомобиль йўлларининг шаҳар ҳудудига кириш-чиқиш қатнов қисмларида транспорт воситаларининг ҳаракати чекланади.
5 сентябрдан 20 сентябргача шаҳар ҳудудига юк автотранспорт воситалари ва махсус техника воситалари қатнови ҳам вақтинча чекланади.
М-37А Самарқанд ҳалқа йўли автомобиль йўлининг 40–43-километрлари оралиғида жойлашган «Самарқанд Сиёб савдо» унитар корхонасига (автомобиллар эҳтиёт қисмлари бозори) келадиган фуқаролар учун мавжуд автураргоҳ йўлнинг қарама-қарши қисмида жойлашганлиги сабабли унитар корхона 5 сентябрдан 20 сентябргача вақтинча фаолият юритмайди.
Мазкур нуфузли тадбир даврида Самарқанд шаҳридаги жамоат жойларида фуқаролар йиғилиб қолиши ҳамда шаҳар ичида транспорт қатновини камайтириш мақсадида шаҳардаги барча умумтаълим мактаблари янги ўқув йилини 19 сентябрь кунидан бошлайди.
Шунингдек, олий ва ўрта-махсус таълим муассасаларида 26 сентябрь кунидан дарс жараёнлари бошланади. Қолдирилган дарс машғулотлари соатларини ўқув йили давомида бериладиган таътиллар ҳисобидан қопланиши белгиланди.
Изоҳ (0)