Қўқон шаҳрига туркий давлатлардан номдор фотографлар таклиф этилади ва «Қўқон туркий фотосуратчилар объективида» рукни остида кўргазма ва ёш фотографлар учун маҳорат дарслари ташкил этилади. Бу ҳақда Маданий мерос агентлиги «Дарё»га маълум қилди.
Ушбу ташаббус Қўқон шаҳри «Туркий дунёнинг туризм пойтахти» мақомини олгани муносабати билан президентнинг 2022 йил 29 июлдаги «Туркий давлатлар билан туризм соҳасидаги ҳамкорликни жадал ривожлантириш чора-тадбирлари тўғрисида»ги қарорига кўра амалга оширилмоқда.
Ўзбекистон бўйлаб ижодий сафарда қатнашиш учун Туркий давлатлар ташкилотига аъзо мамлакатлар (Озарбайжон, Қозоғистон, Қирғизистон, Туркия, Ўзбекистон) ва кузатувчи давлатлардан (Венгрия, Туркманистон) икки нафардан таниқли ижодкор таклиф этилади. Ушбу пресс-тур 2022 йил октябрь ойининг биринчи декадасида ўтказилиши режалаштирилган.
Изоҳ (0)