Тошкент шаҳри Яккасарой технопарки ҳудудидаги ишлаб чиқариш цехида ёнғин содир бўлаётгани хабар қилинганди. Фавқулодда вазиятлар вазирлигининг маълум қилишича, содир бўлган ёнғин бартараф этилди.
Қайд этилишича, 1 сентябрь куни соат 16:26 да Қўшбеги даҳасида жойлашган Яккасарой технопарки ҳудудидаги ишлаб чиқариш цехининг том ва ички қисмида тахминан 1000 квадрат метр майдонда ёнғин содир бўлган.
Шунга кўра ёнғин-қутқарув экипажлари соат 16:31 да ҳодиса жойига етиб бориб, ёнғин соат 17:29 да қуршаб олинган ва соат 18:07 да бартараф этилган. Воқеа жойига ФВВ раҳбарияти, Тошкент шаҳри ФВБ ва туман ФВ бўлими раҳбар ходимлари етиб борган.
Ёнғинни бартараф этишга 11 та ёнғин-қутқарув экипажи, 2 та махсус сув ташишга мўлжалланган (водовоз) автомобиль, 1 та қутқарув отряди экипажи жалб этилган. Ёнғин оқибатида фуқароларнинг тан жароҳати олиш ва ҳалок бўлиш ҳолатлари тўғрисида хабар келиб тушмаган.
Ҳозирда ёнғиннинг келиб чиқиш сабаби ва келтирилган моддий зарар миқдори аниқланмоқда.