Бутун дунё ядровий қуролдан абадий воз кечиши керак, деди БМТ бош котиби Антониу Гутерриш Халқаро ядровий синовларга қарши кураш куни (29 август) муносабати билан Twitter’да ёзган постида.
«Бизнинг дунёмиз анча вақтдан бери ядро қуроли гаровида қолмоқда. Бу ўлим қурилмалари на ғалабани, на хавфсизликни кафолатлайди, улар фақат йўқ қилишга мўлжалланган. Синовлар абадий тўхтатилишини таъминлайлик ва ядро қуролини тарих архивида қолдирайлик», — деб ёзади у.
Маълумот учун ядро қуроллари БМТ Хавфсизлик Кенгашининг доимий аъзолари, жумладан Россия, АҚШ, Франция, Буюк Британия ва Хитой, шунингдек, Ҳиндистон, Исроил, Шимолий Корея ва Покистонда мавжуд.
Ядро қуроли синовларини тўхтатиш механизми Ядровий синовларни тўлиқ тақиқлаш тўғрисидаги шартномада мустаҳкамланган. 1996 йил 10 сентябрда уни 185 та давлат имзолаган, бироқ фақат 170 таси ҳужжатни ратификация қилган. Уни имзолашдан бош тортганлар орасида АҚШ, Хитой ва Исроил бор.
Бундан ташқари, ядро қуролининг айланиши 1970 йил 5 мартдаги Ядро қуролини тарқатмаслик тўғрисидаги шартнома билан тартибга солинади. Унга кўра, ядро қуролига эга бўлмаган давлатларга уни ишлаб чиқариш ёки четдан олиб кириш тақиқланади. Ядровий салоҳиятга эга давлатлар эса бошқа давлатларга уни ишлаб чиқариш ёки сотиб олишга ёрдам бермаслик, бунга ундамаслик мажбуриятини зиммасига олади.
Изоҳ (0)