2022 йил биринчи ярмида акциз солиғи тушумлари ўтган йилнинг шу даври билан солиштирганда 241 млрд сўмга ошди ва 6,5 трлн сўмни ташкил этди. Бу ҳақда Молия вазирлигининг давлат бюджети даромадларининг ижроси бўйича дастлабки натижаларидан маълум бўлди.
Тушумларнинг ошиши, акциз солиғи бўйича ставкаларнинг ўтган йилнинг шу даврига нисбатан ўртача 10 фоизга, хусусан тамаки маҳсулотлари, алкоголь маҳсулотлари ва якуний истеъмолчига бензин, дизель ёқилғиси ва газни реализация қилиш бўйича оширилиши ҳисобига таъминланди.
Божхона органлари маъмурчилигида акциз солиғи тушумлари 151 млрд сўмни ташкил этди, бу ўтган йилнинг шу даврига нисбатан 16,1 млрд сўмга кам.
Нефть маҳсулотларига нисбатан акциз солиғи 2021 йилга қараганда 35 млрд сўмга ошиб 255,3 млрд сўмга етди. Табиий газ бўйича бу кўрсаткич 0,2 трлн сўмга ўсди ва 2,4 трлн сўмни ташкил қилди.
Акциз тўланадиган товарлар импорти ҳажмининг қисқариши ҳисобига, солиқ тушуми бензин бўйича 34,9 млрд сўмга, дизель ёқилғиси бўйича 9 млрд сўмга ва сигареталар бўйича 14,9 млрд сўмга қисқарди.
Импорт қилишда ундириладиган акциз солиғи камайиб, 167,2 млрд сўмдан 151,1 млрд сўмга тушиб кетди. Бундан ташқари мобил алоқа хизматларида ҳам бу кўрсаткич 111,7 млрд сўмга камайди.
Изоҳ (0)