АҚШ президенти Жо Байден маъмурияти Конгрессдан Тайванга 1 миллиард долларлик қурол-яроғ сотишни маъқуллашни сўрашни режалаштирмоқда. Бу ҳақда Politico нашри учта манбасига таяниб хабар берди, деб ёзади «РБК».
Эҳтимолий пакет ҳамон кўриб чиқиш босқичида турибди, унга 355 миллион долларлик 60 та АGM-84L Harpoon Block II кемага қарши ракеталари ва 85,6 миллион долларлик 100 та АIМ-9Х Block II Sidewinder «ҳаво-ҳаво» синфидаги тактик ракеталар кириши мумкин.
Шунингдек, манбаларга кўра, пакет разведка радарини ишлаб чиқиш бўйича 655,4 миллион долларлик шартномани узайтиришни ўз ичига олади.
Нашр суҳбатдошлари тахмин қилишича, ташаббус Вакиллар палатаси ва сенатнинг ваколатли қўмиталари томонидан кўриб чиқилганидан кейин, катта эҳтимол билан сотув маъқулланади. Бироқ Конгрессда таътил давом этаётганини ҳисобга олганда, жараён чўзилиб кетиши мумкин, деб ҳисоблайди улар.
Кейинроқ Хитойнинг Вашингтондаги элчихонаси матбуот котиби Лю Пэнъюй АҚШни Тайванга қурол сотишни тўхтатишга чақирди ва бу «ягона Хитой» тамойилига зид эканини айтди.
Хитой ва Тайвань алоқалари оролга 2 август куни АҚШ Вакиллар палатаси спикери Нэнси Пелосининг ташрифидан кейин кескинлашди. ХХР Тайванни ўз ҳудуди деб ҳисоблайди ва унинг Хитой дипломатик муносабатлар ўрнатган мамлакатлар вакиллари билан алоқаларига қарши чиқади, бундай мулоқотлар унинг суверенитетини бузади, деб ҳисоблайди. АҚШ, ўз навбатида, Пелосининг сафари уларнинг Тайванга нисбатан сиёсатига мувофиқ келишини ва «зиддият учун ҳеч қандай сабаблар йўқ»лигини қайд этди.
Нэнси Пелосининг Тайванга ташрифига жавобан Хитой ҳарбийлари ўқ отиш машқлари билан денгиз ва ҳаво машғулотларини бошлади.
Пекин 1949 йилда Хитойдан мустақил бўлиб ажралиб чиққанини эълон қилган оролни ўз ҳудуди деб ҳисоблайди. Хитой ҳукумати Пелосининг ташрифини кескин танқид қилиб, Пелоси атайлаб провокация уюштиргани ва «ягона Хитой» тамойилини бузганини маълум қилди.
Изоҳ (0)